QALLTAÑATAKI
¿Kawkinsa suma iwxtʼanak jikxatiristxa?
Imillanakataki
Jichhak jutki uka yuqallatakti lupʼiskta. ¡Wali suma uñnaqtʼaniwa! “¿Jupat lupʼiñasti kuna jan walirakisti? Ni uñtʼkpachïtusa”, sasin inas saraksta. Janiw jumakit uka yuqallar munktaxa, jan ukasti mayni imillanakas jupat wal parlapxi. Taqpach imillanakaw jupar uñjasax kusisipxi.
Akatjamatwa uñtantam ukat lartʼantam... jumax janiw kamachañs yatktati. Jan amuytʼasisaw jumax lartʼarakta. Ukatxa... jutasin akham sasaw arunttamxa:
—Sergio satätwa, kamisaraki —sasaw axsartʼasjam sistamxa.
—Waliki —sasaw sarakta.
—Janiw uñjirïksmati... —sasaw jan kun jisktʼañ yatisax jupar sistaxa.
—Walja semananakaw akankxtxay.
¡Jupamp parlasaxa, samkankkasmas ukham amuyasta!
—Jichha jaypʼux utajan fiestaw utjani, ¿janit jutañ munkasma? —sasaw sistamxa
Ukat jukʼamp jakʼachasisaxa, chʼirmtʼasin akham sistamxa:
—Janiw tatajas mamajas utankkaniti, umañanakas utjaniwa. Kamstasa, jutätaw janich...
Sergiox kamsätas uk suyaski. Yaqha imillinakax jankʼakiw jan payachasis “jutäw ukhamax” sasin sapxaspa.
¿Jumasti? ¿Kamsätasa?
Yuqallanakataki
Yatiqir pä masimaw khämat jutasipki, jumax mä jukʼa axsartʼayastawa. Kuns churañ munapxätam ukx amuyxtawa. Niya kimsa kutiw semanan ukham yantʼxapxtamxa.
Maynix akham sistamxa: “¿Sapakïskarakiktati? Sapakpun uñjsmaxay... Jan chʼam laqʼayasiskañamataki ak fumtʼam” sasa. Ukham sasax cigarrükaspa ukham apsuni.
Ukampis janiw tabaco sat cigarrükiti ukxa sum amuyta, ukatx jukʼamp axsartʼayasta. Ukat akham jupar sistaxa:
—Janiw munkti. Yatxaraktasä, janiw nayax...
—Religionaman jarkʼapxtamx janich... sintipuniw taqi kunat jarkʼapxtamxa —sasaw maynïrïkis ukax parlaskirir amuyktʼaytamxa.
—¿Jan ukax janich malltʼañ munktaxa? —sasaw maynix phinqʼacharaktamxa.
—¡Janiwa! ¡Janiw ukatäkiti! —sasaw niya iyawsirjam sisxtaxa.
Ukat mayni yatiqir masimax akham sasaw qhumanttʼasinjam sistamxa: “Jan axsaramti, mä jukʼakxay fumtʼchïtaxa” sasa.
Ukat parlañ qalltkäna uka masimax jakʼachasisaw jinchumat akham sistamxa: “Janiw khitirus awisapkäti” sasa.
¿Kamachätasa?
AKA URAQPACHANWA ukham jan waltʼäwinakan wayn tawaqunakax uñjasipxi. Ukat janiw taqinix ukanakar saykatañatakix wakichatäpkiti. Maynix cigarro fumañatak wiytataxa, akham amuyaspa: “Janiw fumañ munkti, ukampis sapa kutixay mayipxchituxa... Mayjäkiristsa ukham amuyapxañap janiw munkti” sasa. Jan ukaxa, mä tawaqitar mä waynitux nayamp mistsuskañäni sasin saspa ukhaxa, inas jupax akham sas chuymapan sarakirischi: “Suma yuqallawa. ¿Janit yä siskäxa? ¡Mä kutikisaya!” sasa.
Ukhamanak lurañarux walsa wiytasipkchistuxa, ukampis saykatsnawa. Chiqpachansa, amuyunakap jan axsartʼasa arxatañatak wakichasirinakatakix ukanak aguantañax janiw sinti chʼamäkiti. ¿Janit jumax uka wayn tawaqunakjam wakichasiñ munkasma? ¿Kunjamatsa wakichasisma uk janit yatiñ munkasma?
Waynäkasin jan ukax tawaqükasin kunayman jan waltʼäwinakaru jan axsartʼas aguantañatak suma iwxanakaxa, Biblianwa jikxatasi. ¿Kunatsa? Kunattix Diosan amuytʼayata arunakaniwa (2 Timoteo 3:16, 17). ¿Kuna tuqinakatsa yanaptʼiristamxa? Akxaruw mä listax utji. Kawkïr tuqitsa wal yatxatañ muntax uk chimptʼam jan ukax marktʼma.
□ Imillanakamp yuqallanakamp sarnaqaña
□ Yatiqañ utan kunanakarus wiytapxtamxaa
□ Qullq kunjamsa suma apnaqasma
□ Awk taykamampix kunjamsa apasiskta
□ Kunjamätasa ukat kunjamas jikxatasta
□ Kunjamatsa Diosar jukʼamp jakʼachasisma
Jichhax 4, 5 jananak uñxattʼma, amuypachätawa aka listankki uka yatichäwinakax aka libronwa jikxatasi, ukasti llätunka “jaljanakar” jaljatawa. ¿Kawkïrinaksa chimptʼawayta? Uka tuqit kawkïr jaljäwis parli ukwa nayraqat liytʼasmaxa. Kunjamatsa Biblian yatichäwinakapax jakäwiman yanaptʼiristamxa uka tuqitwa aka libron yatxatäta.b
Aka librox arsusiñamatakiw yanaptʼarakïtamxa. Sañäni, sapa yatichäwi tukuyaruwa, “¡Akanak lurä!” sat recuadrox utji. Liytʼasax kun lurañsa amtawayta ukxa ukaruw qillqtʼasiñama. Ukat wakichasiñataki yaqha yanaptʼanakas utjarakiwa, ukaw kuna jan waltʼäwinakansa jikxatasisma ukxa amuytʼayätamxa ukat kunjamatsa mistsusma uksa yanaptʼarakïtamwa, mayax akham satawa: “¿Jan walir wiytatax kamachasmasa?” (132, 133 jananaka). Ukampis janiw ukakïkiti: sapa jaljäwi tukuyarux “Amuytʼäwinakama” sat wakiyäwiw utji, ukaruw sarnaqäwim tuqitsa amuytʼanakam tuqitsa qillqtʼasisma ukat kunjamsa yatiqatamarjamax jichhat aksarux phuqäta uksa qillqtʼasirakismawa. Ukatxa, “Yatiqaskañ sarnaqäwinaka” sat llätunk wakichäwiw utjaraki, ukanxa, Biblian qillqatäki uka jaqinakat kuna suma yatichäwinaksa apssna uka tuqit parli.
Bibliax siwa: “Jikxatarakim yatiñsa, ukhamarak chʼikhi kankañsa” sasa (Proverbios 4:5). Kunas walïski kunas jan walïki janiw uk yatiñakïkiti, jan ukasti sum amuytʼañasawa. Jan walinak lurasaxa, kuna jan walinsa uñjassna, jan ukax askir lurasax kuns jikxataraksna ukanakwa amuytʼañasa. Ukhamarjam lurañäni ukhaxa, jan walir wiytkatasa, janiw axsarkätati ukat taqi chuymaw chʼamani saytʼasirakïta.
Uka jan waltʼäwinakar saykatañax wali chʼamjamäkchisa, janiw jumakix ukham jikxatasktati, uk amtapunïtawa. Ukampis ukham jan waltʼäwinkkasasa, nayrar sarantasipkakiwa. Jumaxa, ukham lurarakismawa. Aka librot sum yatxatma. Biblian iwxanakapapuniw jakäwitaki wali askixa, ukwa aka libro liytʼasax sum amuyäta.
[Qhanañchäwinaka]
a Jiskʼatpach wayn tawaqunakkamax kawkïr yatiqañ utanakarutix sarapki ukanakat parlasawa aka libronxa yatiqañ uta sasin qillqata.
b Aka libron qillqatäki uka jilapart yatichäwinakapaxa ¡Despertad! sat revistanwa mistuwayxi, “Los jóvenes preguntan” sat yatichäwinwa uka tuqit parläna, uka revistasti Jehová Diosan Qhanañchirinakapan sapa phaxsi qillqatawa. Ukhamaraki akan qhanañchaskani uka yatichäwinakax wayn tawaqunakatakiwa, mä arunxa, panpachatakiwa, ukampis jan sinti jachʼaptayañatakixa waynanakat jilapart parlasini.