Jacobojj herencia katoqe

Isaacajj 40 maranëjjäna ukhaw Rebecampejj casarasïna. Jupajj wal Rebecar munasïna. Tiempompejj pä ispa (gemelo) wawanïpjjänwa.

Jilïrejj Esaú satänwa, sullkïristi Jacob satarakïnwa. Esaurojj camponkañaw gustäna, animalanak katuñsa sum yatirakïna. Jacoburojj utankañaw gustarakïna.

Uka tiemponjja, awkin jiwatapat jilïr wawaw mayni wawanakat sipans jukʼamp oraqe, qollqe katoqerïna. Ukaruw herencia sasin sasirïna. Isaacan familiapanjja, Diosajj Abrahanar bendisiñatak arskäna uka promesajj herenciat uñjatarakïnwa. Esaú waynajj janiw Diosan uka promesap yäqkänti. Ukampis Jacobojj wali wakiskiritwa uñjäna.

Mä kutejja, Esaú waynajj animalanak katur sarasaw wali qarit utar kuttʼjjäna. Jacobojj utanwa mä suma manqʼa phayasiskäna, uk muktʼasaw Esaú waynajj akham säna: “¡Jankʼaki, mirä amp suma, uka wila color manqʼamat mä jukʼay wajjtʼita. Wali qaritätwa, manqʼatsa walpun awtjitu!” sasa. Jacobojj akham sarakïnwa: “¡Nayraqatjja, jilïr wawäñ waktʼktam uk aljita!” sasa. Esaú waynajj sarakïnwa: “¡Nayajj manqʼatjamaw jiwaskta! ¿Jilïr wawäñ nayar waktʼkitu ukajj kunatakirak servitusti?” sasa. ¿Esaú waynan ukham luratapat yatiñanïnwa sisnati? Janiwa. Manqʼa laykukiw kunatï wali wakiskirïki uk aptʼasïna.

Isaacajj wali chuymanëjjäna ukhajja, jilïr wawapar bendición churañ tiempow purinjjäna. Ukampis Rebecajj sullkïr Jacob wawaparuw bendición katoqañapatak yanaptʼäna. Esaú waynajj uk yatïna ukhajja, sullkapar jiwayañwa amtäna. Isaacampi Rebecampejj Jacobur jarkʼaqañwa munapjjäna ukatwa akham sapjjäna: ‘Mamaman jilapäki uka Labán tioman utapar escapjjam, Esaú jilaman colerap pasayasiñapkama’ sasa. Jacobojj iyaw sasaw escapjjäna, jan jilapan jiwayatäñataki.