Jehová Diosajj Josué chacharuw ajlli

Moisesajj walja maranakaw Israel markarojj pʼeqtʼjjäna, niya jiwañampëjjarakïnwa. Jehová Diosajj akham sänwa: ‘Janiw jumajj israelitanakarojj suma oraqer irpantkätati. Jayatakwa uka oraq uñtayäma’ sasa. Ukatwa Moisesajj yaqha pʼeqtʼiri uttʼayañapatak Jehová Diosar mayïna. Diosasti akham sänwa: ‘Josué chachamp parlam, juparuw nayajj pʼeqtʼañapatak ajllta’ sasa.

Moisesajj israelitanakar akham sänwa: ‘Niya jiwañampëjjtwa, Josué chachaw suma oraqer irpapjjätam, Diosajj juparuw ajlli’ sasa. Moisesajj Josué chachar akham sänwa: ‘Jan ajjsaramti. Jehová Diosaw yanaptʼätam’ sasa. Mä qhawqha tiempotjja, Moisesajj Nebo qolluruw makatäna. Uka qollutwa Diosajj suma oraq uñtayäna, uka oraqwa Abrahanarusa, Isaacarusa, Jacoburus churapjjämaw sasin nayratpach säna. Moisesajj 120 maraniw jiwjjäna.

Jehová Diosajj Josué chachar akham sänwa: ‘Jordán jawir paskatasajj Canaán oraqer mantam. Kunjamtï Moisesar yanapkayätjja, ukhamarakiw jumar yanapäma. Leyinakaj jan armasisaw sapür liyiñama. Jan ajjsaramti, kuntï sisksma ukanak phoqanim’ sasa.

Josué chachajj paniniruw Jericó marka uñaqer khitäna. Jutïr yatichäwinwa kunas ukan pasäna uk sum yatjjatañäni. Uñaqerinakajj kuttʼanjjapjjäna ukhajja, akham sapjjänwa: ‘Canaán oraqer mantapjjañäni, jaqenakajj wal ajjsarasipki’ sasa. Qhepürusti Josué chachajj ‘sarañatak wakichasipjjam’ sasaw israelitanakar säna. Nayraqatjja sacerdotenakaruw pactor mantat arcas aptʼasit Jordán jawirar khitäna. Uka jawiranjja umajj wali phoqaw saraskäna, ukampis sacerdotenakajj umar taktʼapjjäna ukhajj jawirajj wañtʼjjänwa. Ukhamatwa sacerdotenakajj waña oraqnam chika jawirar puripjjäna. Ukanwa taqpach israelitanakan pasapjjañapkamajj suytʼapjjäna. Uka milagro uñjasajj ¿kuntï Jehová Diosajj Mar Rojo qotan lurkäna uk amtapjjpachänti?

Walja maranak pasatatwa israelitanakajj suma oraqer purjjapjjäna. Ukanwa markanaka utanak lurasipjjäna. Kunaymanwa yapuchasipjjäna, uva yapunaka, huertonaka. Uka suma oraqenjja kunayman suma manqʼañanaka umañanakaw utjäna, ukatwa lecheni miskʼini oraqe satänjja.