Jehová Diosan nakhaskir ejercitopa

Siria markan Ben-Hadad reyipajj walja kutiw Israel markar atacäna. Ukampis Eliseo profetaw Israelan reyipar uk yatiyirïna, ukhamat Israelan reyipajj escapjjañapataki. Ukatwa Ben-Hadad reyejj Eliseor katuntañ amtäna. Dotán markan jakatap yatjjatasajja, mä ejercitoruw katuntanipjjañapatak khitäna.

Sirio soldadonakajj arumaw Dotán markar puripjjäna. Alwajj Eliseon yanapiripajja markajj soldadonakamp muyuntatwa uñjäna, walpun sustjasïna. Jachʼatwa akham sarakïna: ‘¡Eliseo, jichhajj kamachañänisa!’ sasa. Eliseojj sarakïnwa: ‘Jupanakat sipansa, jiwasat saytʼasirinakajj jukʼampïpjjewa’ sasa. Ukhaw Jehová Diosajj Eliseon yanapiriparojj ejercitop uñjayäna, uka marka jakʼankir qollunakajj nakhaskir guerra carronakampi caballonakampi muyuntatänwa.

Sirio soldadonakajj Eliseor katuntañ munapjjäna ukhajja, Eliseojj akham sasaw Jehová Diosar oracionan mayisïna. “Mirä amp suma, aka jaqenakarojj juykhuptayakimaya” sasa. Ukat mä akatjamatwa soldadonakajj uñjapkchïnsa janiw kawkinkapjjatapsa amuyasjjapjjänti. Eliseojj akham sarakïnwa: ‘Janiw akajj thaqapkta uka markäkiti. Nayar arkapjjeta, thaqapkta uka jaqen ukaruw irpapjjäma’ sasa. Soldadonakajj iyaw sasaw Samaria markakam Eliseor arkapjjäna. Israelan reyipajj uka markanwa jakäna.

Puripjjäna ukhakiw sirio soldadonakajj kawkinkapjjänsa uk amuyasipjjäna. Israelan reyipasti ‘¿jupanakar jiwarayäti?’ sasaw Eliseor jisktʼäna. Niyakejjay uka soldadonakajj Eliseor katuntasin jan wal lurañ munapjjchïnjja, ¿Eliseojj jupanakat vengaspachänti? Janiwa. Antisas reyir akham sänwa: ‘Jan jiwarayamti. Manqtʼayasajj sarjjapjjañapatak khitanukjjam’ sasa. Ukatwa Israelan reyipajj mä jachʼa manqʼäwi wakichäna, manqtʼayasajj utanakaparuw khitanukjjäna.