Jerusalén markajj phichantatänwa

Judá oraqenkir israelitanakajja, walja kutiw Jehová Diosat jitheqtasajj falso diosanakar adorapjjäna. Uka maranakanjja, Jehová Diosajj jupanakar yanaptʼañatakiw profetanak khitäna. Ukampis janiw istʼapkänti, antisakiw jupanakat larusipjjäna. ¿Kunjamsa Jehová Diosajj idolonakar adorañ chhaqtayäna?

Babilonian Nabucodonosor reyipajj mayat maywa markanak katuntäna. Jerusalenar nayrïr kutin katuntkäna ukhajja, Joaquín reyiru, principenakaru, soldadonakaru, yatjjattʼat jaqenakar katuntasaw Babiloniar apasjjäna. Jehová Diosan templopan utjkäna uka suma imatanaksa apasïnwa. Ukatsti Nabucodonosor reyejj Sedequías chacharuw Judá oraqen reyipäñapatak uttʼayäna.

Qalltanjja Sedequías reyejj Nabucodonosor reyiruw istʼäna. Ukampis falso profetanakampi uka jakʼankir markanakan jaqenakapampejja, Babilonia marka contra saytʼañapatakiw chʼamañchapjjäna. Jeremías profetasti akham sarakïnwa: ‘Babilonia marka contra saytʼasïtajja, jaqenakaw Judá oraqen jiwarapjjani, manqʼat pistʼañaw utjani, usunakaw utjarakini’ sasa.

Kimsaqallqo maratjja, Sedequías reyejj Babilonia contraw saytʼäna, ukatakejj Egipto markan ejercitoparuw yanaptʼa mayïna. Ukatwa Nabucodonosor reyejj Jerusalenar tukjañatak ejercitop khitanïna. Soldadonakajj markpachwa muyuntapjjäna. Jeremiasajj Sedequías reyir akham sänwa: ‘Jehová Diosajj akham siwa: “Jumatï babilonionakatak sumatak rendisjjätajja, markankirinakasa jumas janiw jiwapkätati. Janitï rendiskätajja ninampiw Jerusalén phichantapjjani, jumarus katuntasaw apapjjarakïtam” sasa’. Sedequiasajj sarakïnwa: ‘¡Janiw rendiskäti!’ sasa.

Mara chikatani pasatatjja babilonionakajj Jerusalén markan murallanakapatwa mä cheq allinukupjjäna. Uknam mantasaw marksa templsa phichantapjjäna. Walja jaqenakaruw jiwarayapjjäna, waljaniruw preso apapjjarakïna.

Sedequías reyejj Jerusalén markat escapjjänwa, ukampis arktasaw babilonionakajj katjanipjjäna. Jericó marka jakʼan katuntasaw Nabucodonosor reyin ukar apapjjäna. Uka reyejja, kunjamsa wawanakapar jiwarayapjjäna uk uñjañapatakiw Sedequías reyir obligäna. Ukatsti juykhuptayasaw carcelar jistʼantäna. Ukanwa Sedequías reyejj jiwjjarakïna. Ukampis Jehová Diosajj akham sasaw Judá markar mä promesa luräna: ‘70 maranak pasatatwa Jerusalén markar kuttʼayapjjäma’ sasa.

¿Babilonia markar apatäpkäna uka waynanakampejj kunas paspachäna? ¿Taqe chuymati Jehová Diosar servisipkakpachäna?