Mä jachʼa qoqampiw samkasïna

Mä arumajja, Nabucodonosor reyejj mayj samkasïna, ukasti wal llakisiyäna. Ukatwa samkajj kamsañs muni uk qhanañchapjjañapatakejj yatiñan jaqenakapar jawsthapïna, ukampis janiw khitis qhanañchañ puedkänti. Qheparojj Daniel profetaruw reyejj parläna.

Reyejj Danielur akham sänwa: ‘Samkajanjja mä jachʼa qoqa uñjta, ukasti alajjpachkamaw jilsüna. Taqe cheqat uñjkayarakïnwa. Suma laphinakani, walja frutanakani ukhamänwa. Animalanakas chʼiwiparuw jutapjjäna, jamachʼinakas ramanakapanwa tapachasipjjäna. Ukatjja mä angelaw alajjpachat saraqanisajj akham artʼäna: “Uka qoqarojj khuchjapjjam, ramanakap khuchurapjjam”, “ukampis khuchoqat jiskʼa troncorojj saphipamppach oraqer jaytapjjam, cobrempit hierrompit lurat mä ñachʼañampi ñachʼantat oraqenkir pastonak taypir jaytapjjam”. “[Qoqan] chuymapajj cambiatäjjpan: jaqen chuymap lantejj mä animalan chuymapat chuymanëjjpan, ukatsti paqallqo tiemponak pasarakpan”. ‘Taqeniw ak amuyapjjani Jehová Diosakiw jachʼa Diosajja, jupaw khitirutï apnaqañ churañ munki ukar churaspa’ sasa.

Uka samkajj kamsañsa muni ukjja Jehová Diosaw Danielur qhanañchäna. Danielojj uk yatïna ukhajj wal sustjasïna, akham sarakïnwa: ‘Jachʼa rey, kuntï uka samkajj sañ munki ukajj enemigonakamjjar purispa ukajj walïspawa, ukampis jumaruw ukajj pasätam. Khuchsupkäna uka jachʼa qoqajj jumätawa. Reinomjja apaqapjjätamwa, salvaje animalanakjamaw chʼojjña alinak manqʼjjäta. Ukampis angelajj ‘troncompi saphipampi jaytapjjam’ sänwa. Ukajj wasitampiw reyëjjäta sañwa munaraki’ sasa.

Mä maratjja Nabucodonosor reyejj palaciop patjjanwa sarnaqaskäna. Babilonia markar uñtasajj wal musparäna. Akham sarakïnwa: ‘¡Babiloniajj wali jachʼawa! ¡Chʼamajampiw uk lurta! ¡Janiw khitis nayjamajj utjkiti!’ sasa. Ukham parlaskäna ukhajja, alajjpachat mä aruw akham sir istʼasïna: ‘¡Nabucodonosor! Reinomajj janiw jumankjjeti’ sasa.

Ukaratpachaw Nabucodonosor reyejj loqherjjäna, salvaje animalar uñtataw tukjjäna. Palaciopatjja alisnukjjapjjänwa, animalanakampiw jakjjarakïna. Ñikʼutapajj paka jamachʼin phuyunakapjamänwa, sillunakapasti jamachʼinakan sillunakapjam wali jachʼanakaw jilantjjarakïna.

Paqallq mara pasatatwa Nabucodonosorajj waliptjjäna, Jehová Diosajj wasitampiw Babilonian reyipat uttʼayjjäna. Ukatwa Nabucodonosor reyejj akham säna: ‘Alajjpachankir Jehová Diosarojj wal jachʼañchta. Jupajj jachʼa jachʼa tukurinakarojj jiskʼachiwa. Jichhajj yatjjtwa, Jupaw jachʼa Apnaqerejja, khitirutï reino churañ munki ukaruw churaraki’ sasa.