“Reinomajj jutpan”

Jehová Diosajj akham sasaw mä promesa luräna: ‘Janiw jachañasa, usuntañasa, ni jiwañasa jukʼamp utj-jjaniti. Nayranakamatjja taqe jachanakwa picharäjja. Kuna jan walinakatï nayrajj utjkäna ukanakat janiw amtasjjapjjätati’ sasa.

Jehová Diosajj Adanampir Evampirojj kusisit suman jakasipjjañapatakiw Edén jardinar jaytäna. Alajjpachankir Awkiparuw adorapjjañapäna, wawanakapampiw aka oraq phoqantapjjañaparakïna. Adanamp Evampejj janiw Diosar istʼapkänti. Ukampis Diosan amtapajj pachpakïskiwa. Diosajj promesanakap phoqapuniwa ukwa aka libron yateqtanjja. Diosan Reinopajj walja bendicionanakwa aka oraqer apanini, ukhamatwa kuntï Diosajj Abrahanar siskäna ukajj phoqasini.

Mä qhawqha tiempotjja janiw Supayasa, demonionakasa ni jan wali jaqenakas utj-jjaniti. Taqeniw Jehová Diosar adorjjañäni. Janiw usuntjjañänisa, ni jiwjjañänisa, jan ukasti sapa alwaw wali chʼamani kusisit sartañäni. Aka oraqejj mä suma paraisoruw tukjjani. Taqeniw suma manqʼanak manqʼasiñäni, suma utanak utachasiñäni. Janiw nuwasiri jan sinttʼasir jaqenakajj utj-jjaniti, suma jaqekamakiw jakasjjañäni. Salvaje animalanakas janiw ajjsarjjestaniti, ni jiwasas jupanakar ajjsarjjañäniti.

Jehová Diosajj jiwatanakar jaktaykani ukhajj wali kusiskañäniwa. Abel, Noé, Abrahán, Sara, Moisés, Rut, Ester, David ukat Diosar nayra servirinakaruw katoqañäni. Jupanakaw aka oraq paraisor tukuyañ yanaptʼistani. Trabajos janiw pistʼkaniti, kunayman lurañanakwa lurañäni.

Jehová Diosajj Paraison jakasisma ukwa muni. Ukanjja Jehová Dios toqet kunayman yateqañäni, kunanaktï jan pienskayätan ukanaksa yateqarakiñäniwa. Ukhamajja, ¡jichhasa wiñayatakisa Jehová Diosar sapürutjam jukʼamp jakʼachasiskakiñäni!