Chuymankipstat jilat kullakanaka
Wali jilïrëjjtan ukhajj ¿kunjamas jikjjatasjjtanjja?
“Chuymachtʼaña: Usutätap laykusa jan ukajj chuymankipstatätap laykusa, yaqhepajj janiw kuntï lurañ munapki uk lurirjamäjjapjjeti” sat yatichäwi uñjjattʼarakïta.
Bibliankir aka sarnaqäwiw yanaptʼistaspa:
Ec 12:1-8. Chuymankipstatäpki ukanakajj kunjamanakansa jikjjatasipjje uka toqet parlkasajja, Salomón reyejj mä poesian akham sänwa: ‘Jupanakajj janiw sum uñj-jjapjjeti (“ventanat uñchʼukir warminakajj” chʼamakak uñj-jjapjje) ukat janirakiw sum istʼjjapjjeti (“cantir taqe warminakajj” aynachtʼatäjjapjjewa)’ sasa.
Jan walin uñjaskasasa mä kun jan lurañ puedkasasa, ¿kunjamatsa chuymankipstat jilat kullakanakajj kusisitäpjjaspa?
Bibliankir aka sarnaqäwinakaw yanaptʼistaspa:
1Sa 12:2, 23. Samuel profetajj wali jilïrëjjäna ukhajja, Jehová Diosan markap laykojj oraskakïnwa.
2Sa 19:31-39. David reyejj Barzilái chachan yanaptʼap wali valoranitwa uñjäna. Barzilái chachajj wali jilïrëjjäna ukhajja, Davidajj jukʼamp luräwinakwa jupar churañ munäna, ukampis “¿kunatarak naya servirimajj jumar chʼam tukuyaskämasti?” sasaw säna.
Sl 71:9, 18. David chachajj wali jilïrëjjäna ukhajja, Jehová Diosatakejj lurañanak phoqañ munaskakïnwa; ukatwa ‘janikiy apanuktʼasistati, jutïr wawanakar chʼamamat yatiyañajatak jaytakitaya’ sasin Diosar ruwtʼasïna.
Lu 2:36-38. Ana viuda warmejj wali jilïrëjjäna ukhajja, Diosar jan jitheqtas servitapat bendicionanakwa katoqäna.
Chuymankipstatäpki ukanakarojj ¿qhawqha valoranitsa Jehová Diosajj uñji?
Sl 92:12-14; Pr 16:31; 20:29; Is 46:4; Tit 2:2-5
Bibliankir aka sarnaqäwinakaw yanaptʼistaspa:
Gé 12:1-4. Abrahán chachajj 75 maranëjjäna ukhajja, “markamat mistjjam, kawkïr oraqtejj uñachtʼaykäma uka oraqer sarjjam” sasaw Jehová Diosajj säna.
Da 10:11, 19; 12:13. Daniel profetajj 90 jila maranëjjäna ukhajja, mä angelajj jupar visitasajj akham sänwa: ‘Diosan wali munat chacha, jumasti tukuykamajj nayrar sarantaskakim. Tukuy urunakanwa kunatï waktʼktam uk katoqañatak sartäta’ sasa.
Lu 1:5-13. Zacarías chachampi Elisabet esposapampejj wali jilïrëjjapjjäna ukhajja, Jehová Diosan bendicionapampejj mä wawanïpjjänwa, uka wawajj Juan satänwa.
Lu 2:25-35. Simeón chachajj wali jilïrëjjäna ukhajja, Mesiasäñapäkäna uka wawaruw nayranakapamp uñjäna; uka qhepatjja jupajj mä profecía uka wawat arsüna.
Hch 7:23, 30-36. Moisés chachajj 80 maranëjjäna ukhaw mä asignación katoqäna, jupajj Diosan Israel markaparuw Egiptot irpsuñapäna.
Diosar jan jitheqtas serviwayapki uka chuymankipstat jilat kullakanakarojja, ¿kunjamsa uñjañasa?
Bibliankir aka sarnaqäwinakaw yanaptʼistaspa:
Gé 45:9-11; 47:12. Jacob chachajj wali jilïrëjjäna ukhajja, José yoqapan ukaruw sarjjäna, yoqapasti jiwañkamaw jupar sum cuidarakïna.
Rut 1:14-17; 2:2, 17, 18, 23. Noemí warmejj wali jilïrëjjäna ukhajja, Rut warmejj parlatapampisa luratapampis wal jupar chʼamañchtʼäna.
Jn 19:26, 27. Jesusajj lawar chʼakkatatäkasin niya jiwañampïskäna ukhajja, Juan munat amigoparuw mamitapar cuidañapatak encargäna.