Wawanakar yatichañataki
Kunatï imantatäkäna ukx taqiniruw yatiysna
MÄ WAKISKIR tuqit yatiyañ munsma, ¿yatiñ munasmati?a... Diosan qullan imantat amtanakapat yatiyañwa munaskayäsma. Biblianxa uka tuqit akham siwa: “Taqi [u]kanakasti Diosan qhanstayatawa, ukampis [‘walja tiempow’, NM] imantatänxa” sasa (Romanos 16:25). Qalltanxa Jehová Diosakiw uk yatïna. Ukampis kunsa jaqin yatiñapatakix luräna uk yatxatañäni.
¿Qullana siski uka arux kamsañsa muni uk yattati?... Uka aruxa, qʼuma ukat wali wakiskiri sañ muni. Niyakixay Diosax qullana ukat qʼumächixa, imantat amtanakapax qullanarakiwa. Ukatwa Diosan qullan imantat amtanakapa sataxa. ¿Khitisa uka wali wakiskiri imantat amtanakapat yatiñ munäna uk yattati?... ¡Angelanakänwa! Akham siw Bibliaxa: “Ukanaksti angelanakas uñjañxa munapxarakïnwa” sasa (1 Pedro 1:12).
Jesusax uka imantat amtanak yatirakïnwa ukat kunapachatï aka uraqir jutkäna ukhaxa jupaw nayraqat arkirinakapar yatiyäna. Jupax akham sänwa: “Jumanakarupï qhanpach yatiyataxa jan amuytʼkaya Diosan reinopatxa” sasa (Marcos 4:11). ¿Amuytati? ¿Kuna tuqitsa Diosan qullan imantat amtanakapax parli?... Diosan Rienopata, mä arunxa, Diosan Apnaqäwipata, Jehová Diosar orañ yatichkistu ukhax uka apnaqäwi mayiñwa Jesusax yatichawayistu (Mateo 6:9, 10).
Kunjamtï yatiqawaytanxa, Diosan Apnaqäwipax walja tiempow imantatäskäna. Diosax Edén huertat Adanamp Evampiru jaqsüna ukhat Jesusax uka imantat amtanakat yatiyäna ukhakamaxa, Diosan luqtirinakapax janiw uka Apnaqäwit yatichäwinak katuqapkänti. Diosax aka Uraq mä paraisor wasitat tukuyañ munaskakïnwa, uka tuqitakwa jupanakax yatipxäna (Génesis 1:26-28; 2:8, 9; Isaías 45:18). Diosan Apnaqäwip purinkani ukhax kunja sumänis aka Uraqin jakañax ukwa jupanakat yaqhipax qhanañchapxäna (Salmo 37:11, 29; Isaías 11:6-9; 25:8; 33:24; 65:21-24).
Ukampis ¿khitirus uka Apnaqäwin apnaqañapatak Diosax uttʼaypachäna? ¿Uk yatiñ munasmati?... Jesucristo Yuqaparuw uttʼayäna. Jupaxa “Sumankañan Jilirip[jam]” apnaqañatakiw chʼam katuqani sasaw Bibliax qhanañchi (Isaías 9:6, 7). Ukatwa jumasa nayas “Diosan imantäwipa uñtʼaña[sa], ukasti Cristo pachpawa” (Colosenses 2:2). ¿Kunsa Cristot yatxatañasa? Nayraqatxa, Diosax nayrïr Yuqapwa Marian purakapar uskutayna ukhamat mä jaqjam naciñapataki. Ukatxa, uka Yuqapaw mä sacrificiot luqtasiñapäna, jiwasan wiñay jakañasataki (Mateo 20:28; Juan 3:16; 17:3).
Diosan qullan imantat amtanakapat jukʼamp parltʼaskakïma: Diosaxa, Jesusamp chika alaxpachan jakapxañapatakix walja chachanaka ukat warminak ajllïna. ¿Kunsa alaxpachan lurapxpachäni?... Cristomp chikaw Apnaqanipxani (Efesios 1:8-12).
¿Khitinakas Jesusamp chika apnaqanipxani uk yatiñ munasmati?... Jupanakat mä qhawqhanixa Jesusan apostolonakapawa, kunattix jupax akham sasaw jupanakar säna: mä utjäwi jumanakatak alaxpachar wakichir sarä sasa (Juan 14:2, 3). Khitinakas Diosan Apnaqäwipan apnaqapxani ukanakat mä qhawqhanin sutinakapxa, Mateo 10:2-4, Marcos 15:39-41 ukat Juan 19:25 qillqatanakanwa jikxatäta.
¿Qhawqhanis alaxpachar sarapxpachäni? Ukax Diosan qullan imantat amtaparakïnwa, ukat janirakiw khitis yatkänti. Ukampis jichhax yatxtanwa, 144.000 ukhanïpxiw sasaw Bibliax qhanañchi (Apocalipsis 14:1, 4).
¿Kunjamakisa jumatakix ‘jan amuytʼkaya Diosan reinopata’ yatxatañaxa? ¿Wali wakiskirixaya?... Ukhamax uka tuqit jukʼamp yatxataskakim, ukhamatwa yaqhanakar yatiyañatak yanaptʼitäta.
[Qhanañchäwi]
a Mä wawatakitï aka yatichäw liytʼaskstaxa, kimsa puntonak uñjasaxa, wawan arstʼañapatakiw saytʼañama.
JISKTʼANAKA:
▪ ¿Kuna tuqitsa parlawaysma, ukat kunatsa ukham satäpacha?
▪ ¿Kuna tuqitsa parli, ukat khitis nayraqat uk yatiyäna?
▪ Diosan qullan imantat amtanakapatxa, ¿kunanaksa amtta?
▪ ¿Kunjamsa uka tuqit amigonakamar qhanañchtʼasma?
[24 janan fotopa]
¿Kuna tuqitsa angelanakax yatiñ munapxäna?