Diosar yupaychañatakix janipuniw jaypʼükiti
Málaga (España) markansti, diciembre phaxsit 19 urunak saraqatar 2009 maranxa, mä mamaw phuchapamp bautisasipxatayna, jupanakax Ana sutinïpxiwa. Uka marax España markanxa 2.352 ukhaniw bautisasiwayapxi, ukampis uka kullakanakat parltʼañax ¿kunatsa wakispacha? Aka pä kullakatxa maynix 107 maraniwa ukat phuchapax 83 maranirakiwa.
¿Kunatsa bautisasisax Diosar taqi chuyma katuyasitapx uñachtʼayapxi? Khä 1970 maranakanxa, Diosar yupaychir mä kullakaw nayraqat 83 maranïki uka Anarux Taman Librot Yatxatañataki sat tantachäwirux utapar jawstʼatäyna, mä qhawqha kutix sarataynawa, ukampis irnaqäwip laykux Diosar yupaychañanx janiw nayrar sartkänti.
Tunka maranak qhipatxa, wawanakapaw Bibliat yatxatañ qalltasin nayraqat bautisasipxäna. Chiqas Mari Carmen sat phuchaparakiw Diosan arunakapat yatiqañapatakix chʼamachtʼäna. Uka qhipatxa, Ana sat awichapas yatxatañx munarakïnwa. Ukhamatwa familiapat tunkanix chiqa yupaychäw tuqit saytʼasipxäna.
Bautisasiñ urusti, Ana sat kullakanakax wali kusisitäpxänwa, ukatwa mamapax akham säna: “Jehová Diosax munasiñap uñachtʼayitu ukatwa arunakapsa yatxatayitu” sasa. Ukxarux phuchapax akham sarakïnwa: “Paraison puriniñapkamaw Diosar yupaychäxa ukat kawkhakamäy chʼamajax utjchini ukhakamaw yatiyir saräxa” sasa.
Uka pä viuda kullakanakax wali kusisitaw tantachäwinakan jikxatasipxi. Tamapankir mä irpir chuymanix akham sarakiwa: “Tantachäwinakatx janiw faltasipkiti ukat Yatiyañataki sat revista yatxatasipkta ukhax arstʼanipxapuniwa” sasa.
Diosat jan jithiqtas yupaychatapaxa, Biblian qillqaskäna uka urunakan jakir viuda Anatwa amtayistu, “jupasti templotxa janiw misturïkänti, jan ukasti arumay uruwa Tatitur servïna ayunonaka, oracionanak lurasa” (Luc. 2:36-38). Chiqas 83 maranïkchinsa, Diosar yupaychañatakix janiw chuymanïxtuwa sirikänti, ukhamarakiw jichhürunakanx jupjam sutini ukat chuymani kullakanakax lurapxi.
¿Diosan arunakap istʼirix familiaman utjarakiti? Jan ukax ¿kunatï chiqäki uk yatxatañ munir chuymankipstataruch uñtʼta? Chiqas Ana sutin chuyman kullakanakjamäspawa ukhamax chiqa Diosar yupaychañatakix janiw jaypʼüxiwa sañäkaspati.
[25 janan qhanañchäwipa]
“Jehová Diosax munasiñap uñachtʼayitu”
[25 janan qhanañchäwipa]
“Paraison puriniñapkamaw Diosar yupaychäxa”