BIBLIA TOQET JISKTʼANAKA
¿Kunas Diosan sutipajja?
Familiasanjja sapa mayniw sutinïtanjja. Utan uywasktan uka animalanakasasa sutinirakiwa. Ukhamasti ¿Diosajj janit sutinïkarakpacha? Biblianjja, Diosat parlañatakejj walja sutiñchanakaw apnaqasi, ukanakat yaqhepajj akanakawa: ‘Taqe chʼamani’, ‘Taqe kunjjar munañani’ ukat ‘Luriri’. Ukampis Diosajj sutinirakiwa. (Isaías 42:8 liytʼäta.)a
Walja Biblianakanjja, Salmo 83:18 jiskʼa tʼaqanwa Diosan sutipajj uñsti. Amuytʼañataki Traducción del Nuevo Mundo de las Santas Escrituras Biblianjja akham siwa: ‘Jaqenakan yatipjjañapataki, jumajj Jehová sutinïtama, juma sapakiw oraqpachjjaru taqe Munañanïtajja’ sasa.
¿Kunatsa Diosan sutip aytasiñajj wakisi?
Munat amigonakasamp parltʼastan ukhajja, sutipatwa parljjaytanjja
Sutipat aytassna ukwa Diosajj muni. Munat amigonakasamp parltʼastan ukhajja, sutipatwa parljjaytanjja. ¿Diosarojj janit sutipat parljjayañajj wakiskarakispa? Diosan sutip aytañasapuniwa sasaw Jesusajj chʼamañchtʼistu. (Mateo 6:9 ukat Juan 17:26, MT liytʼäta.)
Ukampis Diosan amigopäñatakejj janiw sutip mayaki yatiñasäkiti. Jan ukasti ¿kunjam Diosasa? ¿Jupar jakʼachasnat janicha? taqe ukanak yatiñasawa. Uka jisktʼanakana ukat yaqha jisktʼanakan qhanañchäwipajja Bibliankiwa.
[Qhanañchäwi]
a Aymar Biblian glosario siski uka listapanjja, Hebreo arun Diosan sutipajj Yavé satäki uka lantiw “Tatitu” sasajj uchapjje sasaw qhanañchi.