Tiempoparupuniw purinïna

“DRAMA de la Creación” uñjasajja, “¡jan armkayapuniwa!” sasaw waljanejj sapjjäna. Ukajj tiempoparupuniw purinïna. Hitler chachajj Europan jakasir jilat kullakanakar jan sinttʼasis arknaqañ janïr qalltkipanjja, “Drama de la Creación” ukajj waljaniruw Diosar uñtʼapjjañapatak yanaptʼawayi. Ukampisa, ¿ukajj kunänsa?

Khä 1914 maranwa, Jehová Diosan markapajj Brooklyn (Nueva York, Estados Unidos) markan “Foto-Drama de la Creación” uk nayrïr kuti uñtayapjjäna. Ukasti jiskʼa peliculanakampi color fotonakampi, musicakampi ukat arstʼäwinakampi mayachtʼat videönwa ukat kimsaqallqo horanak uñtañatak wakichatänwa. Millón millón jaqenakaw uñtapjjäna. Ukat pachpa marajja, uka videot jiskʼaptayat apsupjjäna, “Drama Eureka” sutimpi. Ukampis 1920 maranakanjja, uñtayañatak fotonakasa, peliculanakasa ukat proyectorasa mirqʼsutäjjänwa. Ukampis jaqenakajj “Foto-Drama” wal uñtañ munapjjäna. Ukat Ludwigsburg (Alemania) markanjja, akham sasaw waljanejj jisktʼapjjäna: “¿Kunapachas ‘Foto-Drama’ wasitat uñtayapjjäta?” sasa.

Uk phoqhañatakejja, Magdeburgo (Alemania) markankir Betelankir mä qhawqha jilatanakaw París markan yatiyirinakat videonak alapjjäna. Ukat Leipzig ukat Dresde empresanakatwa fotonak alapjjäna. Ukarojja, “Foto-Drama” videonkir suma fotonakampwa mä qhawqha yaptʼapjjäna.

Uka videon istʼaskäna uka musicjja, Erich Frost jilataw apsutayna. Ukat kuntï uka videon arstʼaskäna ukajj La Creación sat librot apstʼatänwa. Ukhamatwa “Foto-Drama” videojj “Drama de la Creación” sas uñtʼatäjjäna.

Uka machaq dramajja, “Foto-Drama” videojamarakiw kimsaqallq horanakatak wakichatäna. Ukat niya sapa arumaw jukʼat jukʼat uñtayasïna. Ukanjja akanakaw qhanañchasïna: Diosajj aka Oraqe lurkäna ukhajj kunanakas sapürojj lurasïna, Biblian yatichäwinakapa ukat yaqha yatichäwinakampi; ukat kunjamsa kʼari religionanakajj jaqenakar kʼarintäna uks qhanstayarakïnwa. “Drama de la Creación” ukjja, Alemania, Austria, Luxemburgo, Suiza markanakana ukat kawkhanakantï alemán aru parlapkäna uka cheqanakanwa uñtayapjjäna.

Erich Frost jilatajj siwa: “Drama uñachtʼayapkayäta ukhajja, nämp chikäsipkäna ukat orquestankirinakarus samartʼañ horasan libronaka ukat folletonaka churapjjañapatakiw chʼamañchtʼayäta. Ukhamatwa utat uta yatiyir sarapkäyäta ukat sipansa, qellqatanak walj churapjjayäta” sasa. Johannes Rauthe jilatajja, Polonia markan uñtapjjañapatakiw wakichtʼäna, (jichhajj República Checa). Jilatajj siwa: ‘Uñtirinakajj waljaniw visittʼayasiñatakejj direccionanakap jaytawayapjjäna. Ukhamatwa jilatanakajj suma revisitanak jikjjatapjjäna’ sasa.

Ukat 1930 maranakanjja, kawkhanakantï “Drama de la Creación” uñtayaskäna uk phoqhantapjjänwa ukat taqeniw Jehová Diosan Qhanañchirinakapat parlapjjäna. 1933 maranakatakejja, Alemania markankir sucursalajj kawkhanakantï uñtañatak wakichkäna ukanakarojj niya mä millón jaqenakaw sarapjjatayna. Käthe Krauss kullakajj siwa: “Phesqa urpach drama uñtañatakejja, 10 kilometronakwa kayuk sarapjjerïta ukat kuttʼanipjjerïta. Chʼumi, qollo pata ukat valle cheqnamwa sarapjjerïta” sasa. Else Billharz kullakajj sarakiwa: “‘Drama de la Creación’ uñtañaw cheqa yupaychäwir munasiñatak yanaptʼawayitu” sasa.

Alfred Almendinger jilatajj akham siwa: “Mamajajj uka drama uñtasajja, kusisitaw mä Biblia alasïna ukat ‘purgatorio’ aru thaqhäna, ukampis janiw jikjjatkänti. Ukatwa iglesiaparojj jan sarjjänti ukat bautisasjjänwa” sasa. Erich Frost jilatajj sarakiwa: “Walja jaqenakaw ‘Drama de la Creación’ uñtasajj cheqa yatichäwinak uñtʼawayapjje” sasa (3 Juan 1-3).

Uka videojj waljanir yanaptʼaskäna ukhaw Hitler chachajj Europa toqen chʼaman saytʼasïna ukat jan waltʼäwinakaw utjäna. 1933 mara qalltanjja, Alemania markankir jilat kullakanakan luräwinakapajj jarktʼataw uñjasïna. Uka marat 1945 maran Payïr Jachʼa chʼajjwäwi tukuyañkamaw jilat kullakanakajj arknaqata ukat tʼaqhesiyata uñjasipjjäna. Erich Frost jilatajj kimsaqallqo maraw carcelan jistʼantatäna, ukat mistusajja Wiesbaden (Alemania) markankir sucursalanwa irnaqtʼjjäna. “Drama de la Creación” videojj tiempoparupuniw purïna. Ukat jan ajjsarapjjañapatakiw jilat kullakanakar chʼamañchtʼawayi, kunattejj Payïr Jachʼa Chʼajjwäwinwa iyawsäwipajj yantʼata uñjasiñapäna. (Alemania markat qellqanita.)