Biblia toqet jisktʼanaka

Jesusajj Diosan Yoqapaw sasin ¿kunatsa sissna?

Diosajj wawanakanïñatakejj janiw warminïkiti. Jupaw taqe jakirinakan Luriripajja. Ukampis jaqenakajj Jupat yateqasis sarnaqañatak luratätanwa, Ukatwa Adán sat nayrïr chacharojj ‘Diosan wawapa’ sasïna. Ukat Jesusarojj ukhamarakiw “Diosan Yoqapa” sasirakïna, kunattejj kunjamäkiti Awkipajj ukham luratänwa. (Lucas 3:38 ukat Juan 1:14, 49 liytʼäta.)

¿Diosajj kunapachas Jesusar lurpachäna?

Diosajj Adanat sipansa Jesusaruw nayraqat luräna. Cheqansa, Jesusaw nayrïr luräwipajja, ukat jupa toqerakiw taqe kunsa lurawayäna ukhamarak angelanakarusa. Ukatwa Jesusarojj Diosan “taqe kunatejj utjki ukatjja nayrïriwa” sasin Bibliajj saraki. (Colosenses 1:15, 16 liytʼäta.)

Jesusajj Belén markan janïr naskipanjja, alajjpachan mä ajayünwa. Kunapachatejj horasajj purinjjäna ukhajja, Diosajj Marian purakaparuw Jesusan jakäwip uchäna, ukhamat mä jaqjam nasiñapataki. (Lucas 1:30-32 ukat Juan 6:38; 8:23 liytʼäta.)

¿Diosajj kunatsa Jesusarojj mä jaqjam aka Oraqen nasiypachänjja? ¿Kuna wakiskir luräwsa phoqhawayi? Jumatï uka jisktʼanakan qhanañchäwip Biblian thaqtätajja, kuntï Diosasa ukat Jesusas jiwasanak layku lurawayki ukanakjja, jukʼamp sum amuyjjäta ukat yuspäratamas jukʼampirakiw jiljjattani.