Diosajj chuymaswa phoqtʼi

¿Diosajj jaqenakan tʼaqhesitanakapat llakispachati, jan ukajj janich kuns yatiñ munkpacha? Uka jisktʼarjamajj Bibliaw wal chuymachtʼistu. Diosajj taqe jiwasanakatwa llakisi, ukat kusisit jakasiñaswa munaraki. Cheqas taqeniw Jupan khuyapayasiñap sapürutjam katoqapjje, jan Jupat amtasipki ukanakas katoqapjjarakiwa. Ukhamajj kuntï apóstol Pablojj siskäna uk jichhajj amuytʼañäni. (Hechos 14:16, 17 liytʼäta.)

Listra markan khitinakatï Diosar jan yupaychapkän ukanakarojj akham sasinwa Pablojj säna: ‘Nayra urunakanjja Diosajj taqe jaqenakarojj munañanakaparjamakiw sarnaqayäna. Ukampis Diosajj jupanakarojj yatiyänwa jupan jakatapa, jaqenakar aski luratap toqe. Jupajjay jallsa, suma cosechanaksa churapjjstamjja, ukhamarak walja manqʼañanaksa chuymas phoqtʼat kusisipjjañamataki’ sasa. Listra markankirinakajj ¿kunjamsa uka arunak amuyapjjpachäna?

Pablon uka arunakapajj cheqäskapunïnwa, kunattejj Listra markankirinakajj kawkhantï suma achunakajj achoqkäna uka vallenwa jakasipjjäna. Jallsa, suma cosechanaksa Diosaw churi sasaw jupanakar amtayäna. Ukatwa suma cosecha apthapipkäna, jan ukajj suma manqʼanak katoqapkäna ukhajj Diosan khuyapayasiñap katoqasipkäna.

Uka jiskʼa tʼaqanakajj walja aski yatichäwinakwa Jehová Diosat yatichistu.

Kunsa lurañäni uk jiwas pachpa amtañasatakiw Jehová Diosajj jaytistu. Amuytʼañäni, “Diosajj taqe jaqenakarojj munañanakaparjamakiw sarnaqayäna”. Uka arunakajj kunjams sasispa uk sum amuyañatakejj Biblia jaqokipapki ukanakatak mä yanaptʼajj akham siwa: “Kuntï lurañ munapki uk luraña” jan ukajj “jupanak pachpa kuns amtaña” sasa. Ukhamajj Diosajj janiw khitirus Jupar munkir jan munkir yupaychaykiti, jan ukasti sapa mayniw jakäwipan kuns lurani uk ajlliñapa (Deuteronomio 30:19).

Diosajj Jupar uñtʼañaswa muni. Pablojj akham saskakïnwa: “Diosajj jupanakarojj yatiyänwa jupan jakatapa” sasa. Uka arunakajj kunjams sasispa ukjja, alayan yatjjataniwayktan uka yanaptʼajj akham saskakiwa: “Jupajj janipuniw kunjam Diosäkitejj uk jaqenakar jan uñachtʼaykänti” sasa. Ukajj luratanakapanwa “Diosan jan uñjkay yänakapajj” qhan amuyasi, sañäni: munasiñapa, yatiñapa, chʼamapa ukat khuyapayasiñapa (Romanos 1:20). Ukat kunjam Diosäkitï ukajj Biblianwa jukʼamp sum qhanañchasiraki (2 Timoteo 3:16, 17). Jïsa, Jehová Diosajj Jupar uñtʼañas wal muni.

Jehová Diosajj kusisit jakasiñaswa muni. Diosajj ‘walja manqʼañanakampi ukat kusisiñampiw chuymas phoqtʼi’ sasaw apóstol Pablojj säna. Mä jucharar jan yuspärasir jaqejj qawqhatï manqʼerjamäki ukjwa manqʼaspa, ukat amuyuparjamajj walikïskaspawa. Ukampis, Diosajj kusisit jakasiñaswa muni, uka kusisiñajj Jupat yateqasisina ukat kuntï Jupajj maykistu ukar istʼasakiw jikjjatsna (Salmo 144:15; Mateo 5:3).

Taqeniw Diosan khuyapayasiñap katoqtanjja. Ukhamajj manqʼañampi ukat kusisiñampi phoqtʼir Diosar yuspäratam ¿kunjamsa uñachtʼayasma?