¿Jiwañajj qawqha chʼamanisa?

Jiwañ toqet parlañajj wali chʼamawa, kunattejj wali llakkañawa. Ukampis taqeniw jiwañar puriñäni.

Awk taykasana, warmisana jan ukajj chachasana ukat wawasana jiwañap janiw yatktanti. Mä akatjamata jan ukajj jukʼat jukʼatwa uka llakin uñjassna. Cheqas ukajj wali llakkañapuniwa, ukat aynachtʼayistaspawa.

Antonio chachan awkipajja, automp usuchjayasisaw jiwjjäna. Jupajj akham siwa: “Maynis llave aparawayasin uta punkum lluchʼintawaykaspa ukhamawa. Janipuniw utamar mayamps mantjjätati. Kuntï ukan lurawaykta ukakwa amtasjjäta. Janiw cheqaw sañjamäkiti, ukampis janiw kuns lurkasmati” sasa.

Dorothy warmejj niya ukhamanwa uñjasirakïna, jupajj 47 maranïkän ukhaw chachapajj jiwjjatayna. Dorothy warmejj Anglicana Iglesiaruw saräna, ukat escuela dominical satäkis ukanwa yaticharakïna. Jiwañarukis taqe kunas tukuskaspa ukham janis jupajj amuykchïnjja, cheqapunit ukajj ukhamäna janicha uk janiw sum amuykänti, ukatwa iglesian pʼeqtʼiripar akham sasin jisktʼatäna: “Maynejj jiwjje ukhajj ¿kunas pasjje?” sasa. “Janiw khitis uk yatkiti, yatiñatakejj suytʼañasawa” sasakiw iglesia pʼeqtʼirejj sisjjäna.

¿Ukajj cheqäskapuniti? ¿Yatiñatakejj suyañasäspati, jan ukajj kunjamat yatjjatsnacha?