Bibliajj mä suma paraisot parlki ukaw yanaptʼawayitu

NAYRA JAKÄWIJA:

Riga sat markanwa nasiwayta, uka markajj Letonia markan capitalapawa. Kullakajamp nayampejj mamajampiw jakasipjjayäta, jupajj Católica Iglesiaruw saräna. Fiestanak utjkäna ukhakis iglesiar sarkchïyätjja, jiwasat sipan wali chʼamani maynin utjatapjja yatiyätwa. Ukampis qʼajjo waynitöjjayät ukhajj yaqha amtanakanëjjayätwa.

Nayajj kuns jaratatakirïtwa ukat armthapjjarakirïtwa ukham lurirïtaj mamajajj amuyjjetänwa. Utan taqe kuns jaratatjjakispawa sasin ajjsarayasisajja, janiw sapak jaytirïkituti. Ukatwa jaratatañataki ukat armthapiñatak fierrot lurat mä anatañ regalitäna, ukat ukjja, sapa kutiw jaratatasin armthapirïta. Ukat motomp tʼijuñsa walpun munayäta. Mamajajj uk amuyasajja, Zelta Mopēds (El ciclomotor de oro) sat tʼijüwiruw qellqayitäna. Ukhamatwa tʼijüwinakan tʼijuñ qalltayäta. Nayraqatjja, motoran bicicletata ukat qhepat motompiraki.

Jankʼakiw uka tʼijüwinakan tʼijuñ yateqawayta, ukat wali uñtʼatäjjayätwa. Letonia markanjja, walja kasta tʼijüwinakanwa, kims kuti motomp tʼijus atipjta, ukat Estonia, Letonia ukhamarak Lituania markanakat tʼijüwi utjkäna ukanjja, pay kutiw atipjarakta.

KUNJAMSA BIBLIAJJ YANAPTʼAWAYITU:

Uka tʼijüwinakan wali sum nayrar sartaskayäta ukhaw uñtʼatajajj Jehová Diosan Qhanañchirinakapan mä qellqatap aptasitayna, ukanjja, Bibliat yatichayasiñ mayiñatakiw utjäna. Uñtʼatajajja, Evija satänwa ukat jupampiw qhepat casarasjjta. Jupajj uka qellqatar phoqantasajj jankʼakiw aptʼayäna, ukat mä qawqha tiempotjja, Jehová Diosan Qhanañchirinakapat paniniw Bibliat yatichir jutjjapjjäna. Ukhanakajja, janiw religionanakat yatiñ munirïkayätti, ukampis janiw jupar jarkʼkayätti.

Mä qawqha tiempotjja, Evija warmijar yatichapkäna ukanakajj warmijamp chika yateqañajatakiw invittʼapjjetu. Ukarojj iyaw sistwa, ukat kuntï istʼkta ukajj wali askïnwa. Oraqejj mä suma paraisoruw tukuyatäni sasin Bibliajj qhanañchki ukaw chuymajar purtʼitäna. Salmo 37:10, 11 qellqatwa uñachtʼayapjjetu, ukanjja akham siwa: “Akat mä jukʼa urunakarojj ñanqha lurir jaqenakajj chhaqtjjaniwa; jupanakar thaqkätasa, janiw jikjjatkätati; llampʼu chuymaninakasti oraq katoqapjjani, jilarkir sumankañampiw kusisipjjarakini” sasa.

Sapürutjamaw Bibliat jukʼamp yatjjatañ munjjayäta. Kuna kʼarinaksa religionanakajj yatichapjje uk sum amuyjjayäta. Ukampis Biblian yatichäwinakapajj wal muspharayitu, kunattejj qhana arunakampi ukat amuytʼkañwa yatichi.

Jakäwirojj kunja askitsa Jehová Diosajj uñji ukwa Bibliat yatjjatasajj yateqawayta (Salmo 36:9, NM). Ukat ukaw tʼijüwinak jaytañatak yanaptʼawayitu. Janiw uka tʼijüwinakan jakäwij aptʼasiñ munkayätti, antisas Jehová Diosaruw serviñ munayäta. Taqen uñtʼatäñasa, jachʼar aptatäñasa ukat wal tʼijuñas janiw kusisiyjjetänti.

Jehová Diosan Qhanañchirinakapan walja markanakat jachʼa tantachäwejj Tallin (Estonia) markan 1996 maran apaskäna ukaruw sarta, uka jakʼankir estadionanwa atipañatak tʼijuriyäta. Uka tantachäwinjja, kunayman markat jutir jaqenakaruw mä wawaki tantachtʼasir uñjta. Ukanjja, Jehová Diosan Qhanañchirinakapat mayniw bolsap chhaqayasïna, janipuniw bolsap jikjjatkaniti sasaw sayäta. Ukat mä jukʼampjarojja, jupanakat mayniw bolsap jikjjatatayna ukat phoqatpachwa kuttʼayjjäna. ¡Janipuniw cheqaw sañjamäkänti! Uk uñjasaw Jehová Diosan Qhanañchirinakapajj Biblian yatichäwiparjam sarnaqapjjatap amuyawayta. Warmijampejj ajay toqet nayrar sartasipkakiyätwa ukat 1997 maranwa bautisasjjapjjta.

WALJA BENDICIONANAKWA KATOQAWAYTA:

Motot tʼijuñan tʼijupkayäta uka amigonakajat yaqhepajj jiwatäjjapjjewa. Ukampis Bibliat yateqataj laykuw nayajj jakaskta, kunattejj Jehová Diosaw jakäwi churirejja ukat Juparuw jakäwit manüta.

Pusi maraw Jehová Diosan Qhanañchirinakapan sucursalapan Riga sat markan Jehová Diosar loqtawayapjjta. Jichhajj Alise sat wawajaruw uywasipkta, juparojj Jehová Diosar munasiñwa yatichasipkta. Ukat Letonia markan Bibliat apstʼat qellqatanak jaqokipapki ukarojj semanan may kutiw autonaka ukat yaqha ukhamanak askichir sarta. Wawäkasin kuna lurañtï yateqawaykta ukanakampi yanaptʼañajj wal kusisiyitu. Jichhakamas kuns jaratatasin armthapiskaktwa.

Bibliat yatjjatataj laykuw familiajamp chika Diosat yatiyasipkta. Cheqas Bibliajj mä suma paraisow aka Oraqen utjani siski ukaw yanaptʼawayitu.