¿YATIYÄTATI?

Biblian eunuco sasin qhanañchki ukhajj ¿kuna toqetsa parlaski?

Eunuco arojja, awisajj capsut chachanakat parlañatakiw apnaqasirïna. Biblia qellqaskäna uka tiemponakanjja, yaqhep katuntat chachanakaru jan ukajj esclavonakaruw capsusa castigapjjerïna. Confiykay eunuconakarojj reyinakan warminakap jakapkäna uka utan uñjapjjañapatakiw uchapjjerïna. Amuytʼañataki, Hegai ukat Saasgaz sat chachanakajja, Persia markan Asuero sat reyin warminakapa ukat uñtʼatanakap uñjirïpjjänwa, yaqhepanakajja, Asuero reyejj Jerjes I sat reyiwa sasaw sapjje (Ester 2:3, 14).

Ukampis Biblian eunuco sasinjja, janiw capsut chachanakatpun parlkiti. Awisajja, reyin palaciopan trabajapki uka chachanakat parlañatakiw apnaqasirïna sasaw yaqhep yatjjatatanakajj sapjje. Amuyatajja, Jeremías profetan Ébed-mélec sat amigopasa ukat Etiopía markankir Felipe chachajj yatiykäna ukasa, uka casta chachanakapjjänwa. Ébed-mélec chachajj wali munañanipachänwa, kunattejj Sedequías reyin palaciopankirïnwa (Jeremías 38:7, 8). Ukat ‘Jerusalén markar Diosar yupaychir sarkäna’ uka etiopiankir jaqejja, reyin palaciopanjja, qollqe apnaqerïnwa (Hechos 8:27).

Nayra tiemponakanjja, ¿kunatsa awatirinakajj uwijamp cabritomp jaljapjjerïpachäna?

Kunjamsa jutïrin juchañchasini uka toqetjja, akham sasaw Jesusajj säna: “Jaqen Yoqapajj reyjama jutkani ukapachajja, [jaqenakarojj] jaljarakiniwa, kunjämtejj awatirejj ovejanakarojj cabritonakat jaljkejj ukhama” sasa (Mateo 25:31, 32). ¿Kunatsa ukham sispachäna? Uka tiemponjja, awatirinakajj uwijamp cabritompirojj jaljapjjapunirïnwa. ¿Kunatsa jaljapjjerïna?

Urunjja, uwijanakampir cabritonakampirojj janiw jaljasirïkänti. Arumarojj thayata ukat lunthatanakat jarkʼaqañatakejj uyuruw anantapjjerïna (Génesis 30:32, 33; 31:38-40). Ukampis moqesir cabritonakat jarkʼaqañatakejja, uwijanakarojj yaqha uyuruw anantapjjerïna, ukhamat qachu uwijanakaru qallunakapampir jarkʼaqañataki. Ukat “wawanïpjjañapatakisa, chʼawañatakisa ukat tʼarwa yawiñatakisa” uwijanakarojj jaljapjjapunirïnwa sasaw All Things in the Bible (Todas las cosas de la Biblia) sat librojj qhanañchi. Jesusajj uka uñachtʼäwimp parlkäna ukhajja, jupar istʼapkäna uka judionakajj sum amuyapjjpachäna, jupanakat jila partejj camponwa jakasipjjäna.