¿YATIYÄTATI?
¿Herodes reyejj kunanaksa Jerusalén templo askichañatakejj lurañapäna?
Jerusalén templojj mä qollu patankänwa, uk Salomón reyiw luräna. Templojj inti jalsu toqetsa inti jalanta toqetsa, jachʼa perqanakampi muyuntatänwa. Herodes reyejj Salomonan templopat sipansa, jukʼamp jachʼäñap munäna, ukatwa jachʼaptayañ amtäna.
Askichirinakajj perqanak alay toqeruw jittʼayapjjäna, ukhamat templon uta anqäjjanak utjañapataki. Aynach toqerojj 32 metronak jittʼayarakïna. Ukatakejja, jachʼa perqanakaw lurasïna. Yaqhep cheqan uka perqanakapajja, altorojj 50 metronïnwa.
Herodes reyejja, templo askichasajj janiw judionakan costumbrenakap mayjtʼayañ munkänti, ukhamat judionakan chuymap jan ustʼayañataki. Uka toqet Judea markankir Josefo chachajj akham sänwa: ‘Kawkhantï sacerdotenakajj irnaqapjjerikäna uka cheqanak askichañatakejja, Herodesajj sacerdotenakaruw perqañatakisa, carpinterjam irnaqañatakis yatichäna’ sasa.
Janïr askichañ tukuyaskäna ukhaw Herodesajj jiwawayjjäna. Uka templojj 30 jichha pacha maratakejj 46 maranakaw lurasjjäna (Juan 2:20). Ukampis Herodesan allchhipan wawapaw (Herodes Agripa II) templo askichañ khä nayrïr patak maranakan tukuyjjäna.
¿Kunatsa Malta markankir jaqenakajj apóstol Pablojj jaqe jiwayiriw sasin amuyapjjäna?
Cheqapar uñjir diosajja (chʼeqa) jan cheqapar uñjir diosampiw nuwasiski
Uka islan jakirinakajja, Grecia markan costumbrenakapar yatintatäpjjpachänwa. Hechos qellqatarjamajja, apóstol Pablojj Malta sat islaruw purïna. Pablojj mä jukʼa waña lawanak ninaruw apjjatäna, ukhamat juntʼurtʼasiñataki. Ukampis akatjamatwa mä katarejj Pablor amparapat achthapïna ukat janiw antutkänti. Uka islankirinakajj ukham uñjasinjja, akham sapjjänwa: “Aka chachajj jaqe jiwayirïpachawa. Qotat qhespinkchi ukasa, juchapat [cheqapar uñjatäñapawa, NM]” sasa (Hechos 28:4).
“Cheqapar uñjaña” siski uka arutakejja, Griego arunjja, dike aruw apnaqasi. Uka arojj cheqapar uñjaña sañ muni, ukampis Dike, jan ukajj Dicea arunakjja, cheqapar uñjir diosatakiw Grecia markankirinakajj apnaqapjjerïna. Ukatwa ‘cheqapar uñjir diosaw taqe kunsa uñjaski, ukat Zeus sat diosaruw kuna jan walinakatï jan qhanstki uk yatiyi, ukhamat juchañchañapataki’ sasin amuyapjjerïna. Biblia toqet parlir mä diccionariorjamajja, ‘Malta islankirinakajj Pablojj qotat qhespinkchi ukasa, cheqapar uñjir diosaw mä katari toqe juchap qhanstayaski’ sasaw amuyapjjäna. Qhepatsti janiw ukham amuyjjapjjänti, kunatejj janiw katarejj Pablor kuns kamachkänti.