Aka revista liytʼirinakan jisktʼäwinakapa

Jesusan uñisirinakapajja, ¿kunatsa ampar jarisipjjerïna?

Jesusarusa, arkirinakaparusa kunayman toqetwa uñisirinakapajj juchañchañ munapjjäna. Ukanakat mayajj ampara jareqasiñ toqetänwa. Moisesan Leyinakapanjja, kunjamsa maynejj bañor sarasinsa, lepra usunïsinsa, jiwat animalanaka, jan ukajj jiwat jaqenak apnaqasin qʼomachasispa uka toqenakatwa qhanañchäna. Maynejj sacrificionak loqtasina, umampi jareqasisinwa qʼomachasispäna, jan ukajj sacrificion loqtat animalanakan wilapwa chʼalltʼayañapäna (Lev. 11-15 jaljanaka; Núm. 19 jalja).

Judío religionanakan pʼeqtʼirinakapajj uka leyinakarjamaw sarnaqapjjäna, ukampis uka leyinak mayjtʼayapjjänwa. Mä qellqatajj akham siwa: “Kunjamatsa maynejj qʼañuchasiwayi, kunjamsa mayninakar jan waltʼayaspa, jan ukajj llamktʼasajj kuna cosasanaksa qʼañuchaspa, taqe ukanakwa uñjapjjerïna. Ukjjarusti kun lurasas qʼomachasiñapa ukwa amtapjjarakirïna” sasa.

Mä kutejja, uñisirinakapajj akhamwa Jesusar jisktʼapjjäna: “¿Kunatsa discipulonakamajj nayra awkinakasan sarnaqäwinakaparjama jan phoqhapjje? ¿Kunatarak manqʼañatakisti amparanakap jan jareqasipjjesti?” sasa (Mar. 7:5). Uka arunakampejja, ‘qʼañu amparampi manqʼasin maynejj usuntaspawa’ sasin janiw sañ munapkänti. Judionakatakejja, janïr manqʼkasin ampar jareqasiñajj mä costumbrekïnwa. Uka toqet parlir qellqatajj akham saskakiwa: “Ampar jareqasiñatak lamanajj kunjamäñapänsa, kuna kasta umäñapänsa, khitis amparar um warjjatañapäna, kawkhakamas jareqasiñapäna taqe ukanakatwa judionakajj parlapjjerïna” sasa.

Uka leyinakajj jaqen uñstayatakïnwa. Ukatwa Jesusajj religión pʼeqtʼirinakar akham säna: “Isaías profetajj cheqwa arsüna jumanakan pä amtañan jaqëpjjatamat qhanañchasajja: ‘Aka jaqenakajj lakampikiw yupaychapjjetu, ukampis chuymanakapajj nayatjja jayankaskiwa, inamayakiw nayar yupaychatapajja, yatichäwinakapajj jaqen amtäwipakiwa’ sasa. Jumanakajj Diosan mandamiento arunakapjja apanukupjjtawa, jaqenakan sarnaqäwinakapar phoqhañataki” sasa (Mar. 7:6-8).