Jilïr Irpirinakan Qillqanitapa

JEHOVÁ Diosan Qhanañchirinakapaxa, Jesusjamarakiwa mayisipxaraki: “Sutimax jachʼañchatäpan” sasa. Sarnaqäwisampiwa ukham munatasxa uñachtʼaytanxa. Ukampis janiw Diosan sutip yatiñakïkiti. Jan ukasti kawkjansa Jehová Diosan sutipxa jachʼañchaskakiñasawa. Jïsa, Jehová Diosan Qhanañchirinakapa satäñaxa wali askipuniwa (Mat. 6:9; Isa. 43:10).

Salmo 110:3 qillqatarjamawa Jehová Diosan markapaxa taqi chuyma Diosan arunakaparjam irnaqapxi. ¿Kunatsa wayn tawaqunakasa jilïrinakasa taqi kasta jaqinakasa taqi chuyma yatiyapxpacha? Chiqpachanxa, Diosar munasina ukhamaraki Dios chuymäsinwa ukham lurapxi. Deuteronomio 6:5, 6 qillqatanxa Jehová Diosamaru “taqi chuymamampi, taqi jakañamampi, taqi chʼamamampi munam” siwa. Ukham munasinwa Diosan Apnaqäwip laykuxa tiempsa chʼamsa qullqsa churtanxa, ukatwa yatiyir sarañatakisa tiemposarjam chʼamachastanxa.

Jehová Diosax jaqinakarux wal munasi, janiw khitin chhaqañapsa munkiti, ukatwa Apnaqäwijat suma yatiyäwinak yatiyanipxam sistuxa. Taqinin arrepentisipxañapwa munixa, jan wali sarnaqäwinakapa apanukusa Jupar makatxapxaspa uk munixa, ukhamat wiñay jakapxañapataki (2 Ped. 3:9). “Janiw nayax qhuru jaqin jiwañapxa munkti —siw Jehová Diosaxa—, jan ukasti uka qhuru jakañapxa apanukpan ukatsti jakarakpan” sarakiwa (Eze. 33:11). Jaqi masisar yatiyir sarasinxa, Jehová Diosan munasiñapwa uñachtʼaytanxa. Ukatwa uka suma yatiyäwinakxa wali kusisita yatiytanxa.

Jehová Diosar wal munasisaxa Aruparux sum uñjaraktanxa. Bibliatï jan utjkasapänxa janiw Diosar uñtʼkasänti, janirakiw Santiago 4:8 qillqatarjamas jakʼachaskarakisänsa. Janirakiw kunatsa utjpachätan uksa yatkasänti ni kunas jutïrin utjani uksa, ni Adanan juchapat akhaman uñjastan uksa yatkasänti (Rom. 5:12). Jachʼa munasiñapatwa Diosax jiwasar qhispiyañatak sapa Yuqapar khitani ni uks yatkasänti. Ukhamaraki, kunayman tuqitwa Jehová Diosax uñtʼayistu, yatiñkankañsa churistu, amuytʼayarakistu. ¡Diosan ajayupamp amuytʼata Biblianïsaxa wali kusisitätanwa, wali askipuniwa! Liyiñataki, arunakap yatxatañataki, lupʼiñataki ‘tiemp’ apstʼasisaw uka churäwit yuspäratasxa uñachtʼaytanxa (Efe. 5:15, 16; Sal. 1:1-3). Diosan Arupa sapür liyiñatakixa janiw jayrasiñasäkiti. Diosarutï munasstanxa wal liyiñ munañasaxa, ukhamatwa jukʼampi uñtʼañänixa ukat jukʼampi Jupar munasirakiñänixa.

Jehová Dios contra Adanax juchachaskäna ukhaxa tʼaqhisiñaruw wawanakaparu aptʼawayistu, ukwa Bibliata yatiqtanxa. Ukhamarusa, Diosax jaqinakar qhispiyasapänwa, jïsa qhispiyañatakixa amtaparjamaw luraski (Gén. 3:15).

Chiqpachansa Diosasan wali suma sutipxa wal jachʼañchañ muntanxa. Munat Jehová Diosasaru jukʼamp uñtʼasaxa, sutipata amtapata qhanañchañatakixa juparusa markaparusa jukʼampwa yanaptʼañ muntanxa. Jehová Diosax sum uñjistu ukat yanaptʼarakistuwa, ukatxa jutïr pachanxa wiñay jakañ churarakistani.

Wali munatäpxtawa jilat kullakanaka. Jilïr Irpirinakjamaxa, janïr “jachʼa llakinaka” purinkipana taqinir suma yatiyäwinak yatiyañatak chʼamachtʼasipxatamatxa walpun yuspäranipxsma (Apo. 7:14). Ukhamatwa wiñay jakañ katuqapxañapataki Diosaru ukat Cristoru uñtʼañsa jaqinakar yanaptʼasipktaxa, kunjamtï jumanakax yatiqawayapkta ukham yatiqapxañapataki (Juan 17:3).

Jilatanakama,

Jehová Diosan Qhanañchirinakapan Jilïr Irpirinakapa

[5, 6 jananaka]

Qillqt’asiñataki