Chiqpach yatichäwinakat qhanañchiri revistanakampi yatiyapxañäni
1. Yatiyañataki ukat ¡Despertad! sat revistanakxa, ¿kunjamsa yatiyañataki apnaqtanxa?
1 Yatiyañataki. Jehová Diosan Apnaqäwipat yatiyaski ukat ¡Despertad! uka revistanakaxa, yatiyañatakisa Criston arkirinakapar tukuyañatakisa wal yanaptʼistu, chiqanxa, uka qillqatanakwa jil apnaqtanxa (Mat. 24:14; 28:19, 20). Diosan Apnaqäwipat aka pä aski revistanakampi kunaymanit yatiyañaxa wali askipuniwa.
2. ¿Yatiyañataki ukat ¡Despertad! sat revistanakax kunjamäxisa, ukat kunatsa?
2 Aka revistanakax janiw kunjamäkänti nayrax ukhamäxiti, jan ukasti sapa kutitjamwa yatichäwinakapas suma wakiyatäxi, ukat janiw nayrjam jachʼa revistäxiti, janirakiw nayrjamas lakirasxarakiti. Munkañ luratäñapataki ukat kuna amtampi luratäkitix uk sum phuqañapatakiwa aka revistanakax ukham lurasxi, ukhamat Diosan Apnaqäwipan suma yatiyäwinakapax ‘taqinir’ puriñapataki, ukhamat taqi kasta jaqinakax ‘qhispiyasipxañapataki, kunatix chiqäki uk uñtʼapxañapataki’ (1 Tim. 2:4).
3. Yatiyir sarasaxa, ¿kunjamsa revistanakampix yatiyañäni?
3 2006 enero phaxsit aksaruxa, phaxspachan mä sapa ¡Despertad! revistampi irnaqasaxa, uka revista yaqha yaqha arunakampi yatiyañwa yatsuwaytanxa. Jichhaxa, mä phaxsin mä sapa Yatiyañataki sat revista katuqasax niya ukhamarakiw yatsuñäni. “Revistanakat kunjamsa parltʼasma” sat yanaptʼanakax Diosan Apnaqäwipat Yatiyañataki sat qillqat tukuyankiwa. Chiqanxa, uka yanaptʼanakaxa sapa revistan pʼiqiñchaparjam apstʼatawa, ukampis awisax uka revista taypinkkis uka yatichäwirjam apstʼatarakiwa. Ukat uka yanaptʼax kawkïr yatichäwit apsutas uk sum yatiñäni ukat parlasirïktan ukhamarjam parlañäni ukhaxa, jaqin chuymaparus purtʼarakiñäniwa.
4. Diosan Apnaqäwipat Yatiyañataki sat qillqatan jikxataski uka yanaptʼanakat sipansa, ¿kunatsa yaqha arunakamp parltʼañatak wakichtʼasiñax askïspa?
4 Yatiyañataki ukat ¡Despertad! sat uka pä revistampi yatiyañatakixa pä yanaptʼkamawa Diosan Apnaqäwipat Yatiyañataki sat qillqatanxa jikxatasi, ukampis jumax uka revistanakampi parltʼañatakix yaqha arunakamp wakichtʼasirakismawa. Kawkjantï yatiykta uka chiqankir jaqinakaxa, inas uka revistankir yaqha yatichäwit istʼañ munapxarakchispa. Jan ukax kawkïr yatichäwitix jumatak wali askïki ukatsa parltʼarakismawa.
5. Mä revistampi parltʼañatak janïr wakichaskasaxa, ¿kamachañamasa?
5 Parltʼañatakix kunjamsa yaqha arunakampi wakichtʼassna. Inas mä revistampi yatiyañatakix jan taqpach liyiñ tukuykchïtati, ukampis kawkïr yatichäwimpis parlañ munta ukxa sumwa yatiñama. Kusisit taqi chuymampi parlañaxa wali wakiskiriwa, ukhamax kuna tuqitsa uka yatichäwix parli uk jan sum yatkäsaxa, janiw kusisit taqi chuymampix parlkasmati.
6. Revistat parltʼañatakixa, ¿kunjamsa arunakamarjam parltʼañatakix wakichtʼasisma?
6 Jichhaxa, khiti jaqinakarutï yatiykäta ukatakjamaw wakichtʼasïta. Kuna yatichäwit yatiyañsa amtaskta uk yatxatañ munañapatakiw mä suma jisktʼa jisktʼasma. Diosan Arupakiwa jaqin chuymaparux purtʼaspa ukaruw atinisiñama (Heb. 4:12). Ukhamax kuna yatichäwittï parlañ amtkta ukatakixa Bibliat apstʼat mä jiskʼa tʼaqa liytʼañatakiw wakichasiñama, chiqanxa, uka revistankir jiskʼa tʼaqa liytʼañax wali askipunïspawa. Ukat kunjamsa uka jiskʼa tʼaqa liytʼasaxa revistan yatichäwip uñxattʼayäta uksa amuytʼasiñamarakiwa.
7. ¿Kunjamatsa revistanakamp yatiyañatak wakichasktan ukar sum yatintsna?
7 Taqi chiqan revistamp yatiyañäni. Revistanakat parltʼañataki wakichtʼasisaxa, ukarjamaw lurañasa, ukhamat askinak apsuñäni. Tamamp chika sapa sabado revistanakat yatiyir sarañäni. Yaqha qillqatanak katuqasirinakar aka revistanak churañäni. Bibliat yatiqirinakarux churapuniñäni, ukat yatichir kuttʼasas yaqha jaqinakamp jikisiñäni ukhasa aka revistanak churarakiñäni. Alasir sarkasasa jan ukax kawkir sarkasasa jaqimpi parltʼañäni ukhaxa liytʼañapatak jaytarakikiñäni, jan ukax doctorar suyasasa uka revistampi yatiyarakiñäni. Sapa kuti wakichtʼasitamarjam parläta ukhaxa sumwa yatintäta.
8. Yatiyañataki sat revistat sipansa, ¡Despertad! sat revistat sipansa, ¿kunatsa ukham yaqha revistax jan utjki?
8 Yatiyañataki ukat ¡Despertad! sat revistanakat sipansa, janiw ukham yaqha revistax utjkiti. Kunattixa, taqi kunxar Munañani Jehová Diosaruw jachʼañchi (Hech. 4:24). Diosan Apnaqäwipan suma yatiyäwinakapampiw jaqinakar chuymachi ukat Jesucristor iyawsapxañapatakiwa chʼamañcharaki (Mat. 24:14; Hech. 10:43). Ukhamaraki, kunjamsa jichhürunakan Bibliankir profecianakax phuqasiski ukanakwa yatiyarakistu (Mat. 25:13). Aka revistat askinaka apsupxañapataki markachir masinakasar yanaptʼapxañäni: ukhamax aka revistanakampi taqi chiqan yatiyañataki wakichasipxañäni.
9. ¿Kuttʼasax kuna tuqitsa parlsna?
9 Qhip qhiparuxa, mä jisktʼwa jisktʼañama jan ukax amuytʼasiñapatakiw mä qhawqha arunak arstʼañama. Ukhamatwa yaqha uru kuttʼasaxa, revista katuqasirimpisa jan ukax ukhamak parltʼawayapxsta uka jaqimpisa, wasitampi uka tuqit parltʼapxäta. Kusisit chuymampi chiqa yatichäwinakat yatiyir sarañäni ukhaxa, Jehová Diosax jupar taqi chuyma uñtʼaña ukat luqtañ munirinakaruxa chuymapsa jisktʼaraniwa (1 Cor. 3:6).