Iyawsäwinïtasax qhanawa
1. ¿Kunanakaw pasani sasas Jesusax säna?
1 Jesusax apnaqäwipankxani ukhasa ukat akapachax niya tukusiñampïxani ukhasa kunanakas pasani ukanakatwa apostolanakax Yatichiripar ischʼukisipkäna. Jaqinakax chʼaxwañanakana, manqʼat pistʼañanakana, uraq khatatinakana, ukat yaqha jan waltʼäwinakanwa uñjasipxani sasaw säna. Chiqpach arkirinakajax uñisita tʼaqhisiyataw sarnaqapxani; yaqhip arkirinakajasti jiwayataw uñjasipxani. Kʼari profetanakaw waljanir irpanukupxani. Ukat jilapart jaqinakan munasiñapax chhaqtxarakiniwa sasaw sarakïna.
2. Aka uraqpachan suma yatiyäwinak yatiyir sarktan ukax muspharañjamawa, ¿kunatsa ukham sistanxa?
2 Taqi ukanakat arskasawa Diosan Apnaqäwipan suma yatiyäwinakap yatiyirix aka uraqpacharuw sarapxäta sasin Jesusax säna, uka arsutapax arkirinakapatakix mayjäpachänwa (Mat. 24:3-14). Ukampis jichhürunakanwa Jesusan uka arsutanakapan phuqasitapxa uñjtanxa. Jan wali tiemponakansay jakstanxa, ukampis Jehová Diosan Qhanañchirinakapjamax kusisit chuymampiw suma yatiyäwinakxa yatiytanxa. Akapachanxa munasiñax chhaqtaskiwa, ukampis jiwasanakan munasiñasax sapürutjamaw jukʼampi jilxattaski. ‘Taqi markanakanwa’ uñisita sarnaqtanxa, ukhamäkipansa taqi markanakanwa yatiyaraktanxa.
3. Uraqpachan kunjamsa irnaqtʼasiwayatayna uka yatiyäwinakatxa, ¿kawkïrinakas wali chʼamañchtʼasir yatiyäwinakaxa?
3 Kunjamsa Jehová Diosan Qhanañchirinakapaxa 2006 septiembre phaxsit 2007 agosto tukuykamax irnaqtʼawayapxatayna ukax aka qillqatankaskiwa, 3-6 jananakana. Uk uñakiptʼasax chʼamachtʼataw jikxatastanxa. Amuytʼañataki, suma yatiyäwinak yatiyasa ukhamaraki yatichasaxa, tunka suxtani marawa waranqa millonat sipansa jila horanakax sapa mara irnaqtʼawaytanxa. ¡Iyawsäwinïtasaxa wali qhanapuniwa! Septiembre 2005-agosto 2006 ukat septiembre 2006-agosto 2007 uka pä marat apsutax akhamaw jilxattawayi: precursoranakax 5,8%, yatiyirinakax 3,1%, Bibliat yatiqirinakax 4,4%, bautisasirinakax 20,1%. ¡Niya paqallqu millón jaqinakaw Jehová Diosar luqtasktanxa ukax wali kusiskañawa! ¡Janipuniw ukharux puripxirïktanti! ¿Jumatakix kawkïr yatiyäwis wali askixa?
4. Bautisasiñatakixa, ¿kuna vicionaksa Guillermox jaytatayna?
4 Jaksutax wali muspharañjamawa, ukampis jaqinakan iyawsäwip layku chʼamachtʼasitanakapawa. Amuytʼañatakix Guillermot parltʼañäni. Jupasti Bolivia markanwa utjasi. 1935 maran yuritayna ukat llätunka maranïkasaw coca yapuchañan irnaqatayna. Wawäkasinwa irnaqäwipan jan qarjañatakix coca akhulliñaru yatintatayna. Ukat tiempompix machañaru ukat cigarro pitañaruw purirakitayna. Ukat Jehová Diosan mayitanakapat yatiqxasaxa, tabacompi machañampxa jaytanukxänwa. Ukampis coca akhulliñaw jupatakix jan apanukuñjamäkänti. Ukat Diosat walja kuti yanaptʼa maytʼasisawa uka vicio apanukxäna, ukatxa bautisasxänwa. Guillermox akham siwa: “Jichhax qʼumaw jikxatasxta ukat wali kusisitarakïtwa” sasa.
5. ¿Kuns muntanxa?
5 Jehová Diosax jaqinakatxa wal llakisi, arrepentisisa jupar kuttʼxapxaspa uk muni (2 Ped. 3:9). Jiwasax ukwa munaraktanxa. Ukhamasti suma chuyman jaqinakaru chuymatpach yanaptʼapxañäni Jehová Diosar uñtʼapxañapataki ukat kunjamtï jiwasax Diosar munasktan ukham munasipxañapatakiraki.