Kunanakatï chʼamanïki ukanakar atipjirïtanwa
1 Supayax waranq waranq maranakaw sallqjañanakampi ukat kʼari yatichäwinakampix jaqinakan chuymanakapsa amuyunakapsa chʼamaktʼayi. Jupaxa kʼari yatichäwinak yatichasiñapatakiw wiyti, sañäni: Trinidad, jan jiwir almanïtasa ukat aqkïr infierno; janiw Diosax utjkiti, Bibliax jaqin qillqatakiw sasin jaqinakarux amuytʼayi ukat kastap tuqi jachʼañchasiñanakampi ukat yaqhanakampiw jaqinakar Diosan Arup jan istʼapxañapatakix jarkʼi (2 Cor. 4:4). ¿Kunjamsa uka amuyunakar atipjsna? (2 Cor. 10:4, 5.)
2 Amuyunakap respetapxañäni. Chiqpachansa, kuntï jaqinakax yupaychäwipat amuyapki ukax chuymapar saphintatäkaspas ukhamawa; yaqhipanakaxa wawatpachwa uka yatichäwinakarjam jilsupxi. Jiwasatï yanaptʼañ munstanxa, kuntï amuyki ukar respetañasawa (1 Ped. 3:15).
3 Mä jaqix kuns amuyi ukat kunatsa, uk sum istʼapxañasawa ukhamat jupar respetatas uñachtʼaysnaxa (Sant. 1:19). Sañäni, maynitï almax janiw jiwkiti sasin sistaspa ukhaxa, inasa mä munat masipan jiwatapata wasitat uñjañ munatap layku ukham amuychispa. Jan ukax familiapampi qamartʼañ layku kʼari yupaychäwin fiestanakap amtchi. Jiwasatï kuntï siskani uk sum istʼañänixa, sum parltʼañxa yatirakiñäniwa (Pro. 16:23).
4 Jesusat yatiqasipxañäni. Kunjamsa Jesusax Moisesan Leyipat wali yatxattʼat jaqin jisktʼaparux qhanañchäna uk yatiqasiraksnawa. Janiw jankʼaki jisktʼapar qhanañchkänti ukhamtï lurasäpanxa janiw istʼkasapänti, kunattix jupax yaqha amuyunïnwa, ukatwa Jesusax Diosan Arupat aytasaxa, kuntï jupax amuykän uk arstʼañapatakiw jisktʼäna ukatxa mä amuytʼayäwimpiw amuytʼayarakïna (Luc. 10:25-37).
5 Kʼari yatichäwinakaxa, jaqinakan chuymapanxa wali saphintatjamäkchisa, Diosan Arupax chʼamaniwa ukat Arupat yatiqasaxa jaqinakax kʼari yatichäwinakap jaytanukupxaspawa (Heb. 4:12). Jaqinakaru paciencia chuymampi Diosan Arupat yatichañäni ukhaxa chuymaparuw purtʼañäni, ukhamatwa kʼari yupaychäwip jaytapxani ukat kunatï chiqäki uk uñtʼasax qhispiyasipxarakini (Juan 8:32).