Jisktʼäwinaka

◼ ¿Familpacha Bibliat yatxatapki ukhaxa, awkimppacha taykamppachati informe churapxaspa?

Chiqpachansa, awkisay wawanakaparu “[Jehová] Tatitur iyawsapxañapataki” yatichañapächixa, ukampisa awkis taykas panpachaniw wawanakaparu yatichapxañapa (Efe. 6:4). Ukatpï Bibliax akham saskixa: “Wawaxay, istʼam awkimana yatichäwinakapa, janikiy taykaman yatichäwinakapxa jiskʼachʼamti” sasa (Pro. 1:8). Ukham wawar yatichañatakixa, familiampi Bibliat yatxatañaw wali wakiskirixa.

Nayraxa, awkimppach taykamppachas wawanakapar yatichapkchïnxa, awkikiwa jan ukax taykakiwa wawanakapar Bibliat yatichatatxa horanak jakhusïna. Jichhax janiw ukhamäxaniti. Familjam yatxatäwintix jan bautisatäki uka wawapar awkimppach taykamppacha yatichapxanixa, pampachaniw semanan mä horkam yatichapxatapat informe qillqasipxañapa. Chiqpachansa, awk taykax semananxa janiw mä horak wawanakapar yatichapkiti, jan ukasti sapür yatichañatakiw chʼamachasipxi (Deu. 6:6-9). Ukampisa kunjamsa yaqha jaqinakar Diosan arunakapat qhanañchktan uk yatiyañatakiw informe churtanxa, ukhamasti semanan qhawqha horanaksaya, qhawqha kutisay yatichaskañäni, jan ukax sapa mayni wawanakarusay yaqha yaqh yatichasipkañäni, janiw mä horat jila jakhuñax wakiskaspati. Ukampisa, maynikiw awkitsa jan ukax taykatsa mä yatiqirjam (estudio) jakhusiñapa, ukhamaraki sapa seman yatichatapatsa maynikiw mä revisitjam qillqtʼasiñapa.