¿Razonamiento sat librompi irnaqasktati?
1. ¿Kunjamsa Pablompi, Jesusampix yatichapxäna?
1 Apóstol Pablox walpunwa jaqinakaru “Qillqatanakarjam [...] qhanañ[chañatakix]” chʼamachasïna (Hech. 17:2, 3; 18:19). Ukham yatichañatakix Jesusatwa yatiqasïna, Jesusax Qullan Qillqatanakatpunwa yatichirïna ukat istʼirinakaparux uñachtʼäwinakampiw Diosan amtäwinakapat sum amuytʼayirïna (Mat. 12:1-12). Jiwasan ukham yatichañatakirakiw Razonamiento a partir de las Escrituras sat librox lurasiwayi.
2. ¿Sum yatichañatakix kunjamsa Razonamiento librox yanaptʼistaspa?
2 Kunjamsa qalltsna. Qalltañatakix walja yanaptʼanakaw Razonamiento libron 9–15 jananakan utji. Uka yanaptʼanak yatiqañaw wakisispa, ukhamatwa kawkhantï yatiyktan uka chiqanakanxa may maya tuqit parltʼsna, yämas sapa kuti pachparu kutʼtan ukhaxa. Ukhamax yatiqatasarjam kunayman tuqit istʼiritakjam parltʼañäni ukhaxa waljaniw istʼañ munapxarakini. Telefonot yatiykasasa jan ukax punkupan intercomunicador ukanïchi ukhaxa, pachpa librot liytʼañaw wakisispaxa.
3. ¿Kuna wakiskir yanaptʼanakasa Razonamiento libron 16–24 jananakapan utji?
3 Jan istʼañ munkistu ukhaxa. ¿Kunjamatsa jan istʼañ munirinakar yatichañatakix wakichtʼassna?, ukat ¿janit mä jukʼa tiempo apstʼasisax yatiyir sarañatak 16–21 uka jananak uñakiptʼañax wakiskaspa? Kunapachatï janiw munkti sistäni ukhaxa jankʼakiw kuntï waktʼayasktan ukampix yatichañänixa. Awisax yatiyir sarkasax budista, hindú, judío jan ukax musulmán ukham jaqinakamp parlañaw waktʼistaspa, ukhamäspa ukhaxa, ¿kamachsnasa? 21–24 jananakan jikxataski ukanakaw yanaptʼistaspa.
4. Kunapachatï jisktʼanakapar qhanañchañax chʼamäspa ukhaxa, ¿kunjamsa Razonamiento librompix qhanañchasma?
4 Kunjamsa jisktʼanakapar qhanañchsna. Kunapachatï jisktʼanakapar qhanañchañax chʼamäspa ukhaxa, Razonamiento librow yanaptʼistaspa. Chiqas uka librompi irnaqañax janiw chʼamäkiti, jisktʼasinxa libro apstʼasax qhanañchtʼakismawa. Kuna tuqitsa parltʼäta ukxa jankʼakiw librot thaqtañama, kuna letrampis qallti uk uñakiptʼasax chʼiyar letranakampi jisktʼanakax qillqatäki uk thaqhañamawa. Janitï jikxatkäta ukhaxa, uka pachpa libron tukuyapanxa índice siski uka chiq thaqtarakïta. Ukat jikxatasaxa, pachpa librotwa liytʼañama. Jichhax Bibliat apstʼat mä jiskʼa tʼaqa thaqhañ munsta ukhaxa 445 janan “Textos bíblicos que suelen aplicarse mal” siski uka chiq uñxattʼarakïta.
5. ¿Kunanakatakisa Razonamiento librox wali wakiskirixa?
5 Kunjamsa apnaqaraksna. Yaqhip jilat kullakanakax irnaqäwina jan ukax yatiqañ utanwa Razonamiento libro apnaqapxi ukhamatwa, “¿kunatsa jumanakax jan fiestanakar sarapkta?” sataxa qhanañchtʼapxi. Wayn tawaqunakarux “Creación” ukat “Evolución” siski uka chiqanakaw yatiqañ utan tareanak lurañatakix yanaptʼaraki. ¿Maynin mä munat familiarapax jiwxchi ukan utaparut saräta jan ukax usutanïki ukan utaparuch saräta? Ukanakar chuymachtʼañatakixa “Estímulo” siski uka chiqanwa Bibliat apstʼat jiskʼa tʼaqanakax utji. Ukat arstʼäwinaka wakichañatakisa yatiyir mistsuñatak tantachäwitakisa Razonamiento librox wali wakiskiripuniwa.
6. ¿Kuna amtampis yatiyir sartanxa?
6 Janiw jaqinakar jiskʼachañatakisa ni aliq yatiyirikis sarktanti. Jan ukasti Qullan Qillqatanakatwa sum qhanañchañ muntanxa. Ukhamax sum yatichañatakixa Razonamiento libro sum apnaqañwa yatiñasa, ukhamatwa yatichäwisarus wali askit uñjañäni (1 Tim. 4:16).