Uraqpachan Jilïr Irpirinakan qillqanitapa
Munat jilat kullakanaka:
¡Jumanakar qillqaniñax wali kusiskañapuniwa! Kunjamtix apóstol Juanax jikxatasïnxa uka kikparakiw nänakax jikxatasipxta, jupaxa jilat kullakanakaparux ‘chiqpachapuniw munasïna’ ukat “chiqana sarnaqiri” uñjasasa wali kusisitaw jikxatasta sasaw säna (2 Juan 1, 4, Machaka Testamento). Chiqpach yatichäwinak uñtʼañax taqinitakis suma bendicionapuniwa. Uka yatichäwinak uñtʼañaxa Jachʼa Babiloniatsa yatichäwinakapatsa ukat Diosar jiskʼachir costumbrenakapatsa qhispiyistuwa. Kuntï Bibliax yatichki ukar istʼañaxa munasiri khuyaptʼayasiri ukat Diosan nayraqatapan aski jaqinakjam uñtʼatäñasataki ukat wiñay jakañ suytʼäwinïñasatakiw yanapistu.
Jehová Diosan qullan ajayupaw sapür chʼamañchistu ukat kawkinjamtix sarañasäki uka thaksa uñachtʼayistuxa ukatwa wal yuspärtanxa. Diosan mä suma churäwipjamax kunjamanakatsa qullan ajayux yanaptʼistu ukanakaw “Qullan ajayumpi irpayasipxañäni” sat kimsa uru jachʼa tantachäwin qhanañchtʼasiwayi, uka yatichäwinakax jumanakatakix wali askipunïpachänwa. Sapürunjamaw aka ñanqha pachax jukʼamp jan walir saraski, ukatwa aka qhip qhipa urunakanxa Jehová Diosan qullan ajayaparu atinisiñax wali wakiskiripunixa.
Kunjamsa jilat kullakanakasax iyawsäwip laykux wal tʼaqhisipxatayna ukanakat Anuario sat libron liytʼasax chuymasax chʼallxtistuwa. Diosat jan jithiqtiri jilat kullakanakax jan walinakar saykatapkäna ukhaxa waljaniw ukhaki bautisasisipkäna, yaqhipanakax janiw bautisatäpkänsa. Diosat jan jithiqtapxatapata ukat kunatï chiqapäki uka tuqit saytʼasipxatapatsa ¡walpun jupanakar munastanxa! Ukham taqi chuyma Diosar luqtapxatap uñjasaxa Diosan Apnaqäwipat jan jithiqtañasatakiw chʼamañchtʼarakistu (1 Tes. 1:6-8).
Munat jilat kullakanaka, kunjamsa familianakamar munasiñampi mayachtʼat uywañ laykux qullqi pistʼañansa ukat yaqha jan waltʼäwinakansa uñjasipxta ukxa nänakax sum amuyapxta. Yaqhipanakatakix Diosan Apnaqäwipat yatiyaskakiñasa ukat taman kuna lurañanakatï utjki ukanak phuqañasa janiw faciläkarakiti. Ukatwa taqi ukanak sum amuytʼasa ukat Diosat wal mayisisaxa 2009 maran enero phaxsit mä uru saraqatarux taman utjki uka tantachäwinakax mayjtʼayatäxani, ukhamat familianakamampi jan ukax sapaki Bibliat yatxatapxañamatakisa jukʼamp tiemponïpxarakïta.
Jachʼa tantachäwinakana waljanir bautisasir uñjasax walpun kusisipxta, uka taypinxa jiskʼa wawanakas utjarakiwa. Awk taykanaka, chiqpach yatichäwinakar munapxañapataki ukat wayn tawaqükasina Jehová Diosar luqtapxañapatakisa walikpun wawanakamar chʼamañchtʼapxtaxa sasaw sanipxsma. Uka jiskʼa wawanakax kunayman jan waltʼäwinakanwa yatiqañ utanakan jikxatasipxi, ukhampachasa bautisasipxiwa, ukaxa awk taykanakjamax wawanakamar sum yatichapxatam uñachtʼayaraki (Sal. 128:1-6).
Maysa tuqitxa Bibliat yatiqirinakax wal jilxattawayi, misioneronakana ukat precursor especialanakan taqi chuyma irnaqtʼapxatap laykuw ukham jilxattawayaraki. Uraqpachan Jilïr Irpirinakjamaxa, Uraqpachankir jilat kullakanakan llampʼu chuyman jaqinakaru ‘jakañ umat inak umtʼir’ jutapxañapataki jawstʼapxatapatxa wali askitpun uñjapxta (Apo. 22:17). Pasïr marax 289.678 jilat kullakanakaw bautisasiwayapxi, jupanakarux wali munasiñampiw Diosan markapar katuqtʼtanxa.
Apóstol Juanan aka arunakapat amtasiñax wali wakiskiripuniwa: “Akapachax tukusirikiwa jan wali luräwinakapamppacha, ukampis kawkïritix Diosan munañap lurki ukax wiñayatakiw jaki” (1 Juan 2:17). Niyaw akapachax ‘tukusini’, ukatwa taqi chuyma Diosan munañap lurañasa ukat yupaychäwisan jan ikjas ‘suyañasa’ wali wakiskirixa (Mat. 24:42). Ukhamtï lurañänixa janipuniw inamayäkaniti ukat munasir Jehová Diosan bendicionanakapsa katuqarakiñäniwa (Isa. 63:7).
Anuario sat libron kunayman lugaranakata jilat kullakanakasan sarnaqäwinakap liytʼañaxa, jakäwisana Diosan Apnaqäwip nayraqatar uchañasatakiw chʼamachistani. Jilat kullakanaka ak yatipxañamawa, jumanakatxa janipuniw armasipkti, oracionanakajansa amtasipxapunsmawa, jumanakarux walpun munasipxsma Jehová Diosax jumanakar bendiciskakpanaya.
Jilatanakama,
Jehová Diosan Qhanañchirinakapan Uraqpachan Jilïr Irpirinakapa
[5-8 jananakan tablapa]
JEHOVÁ DIOSAN QHANAÑCHIRINAKAPAN IRNAQÄWIPA (SEPT. 2007-AG. 2008)
(Sumpach amuytʼañatakix qillqatan mistki uk uñxatañamawa)
2007 septiembre phaxsit 2008 agosto tukuykamaxa, 141.000.000 dólares ukha qullqwa precursores especiales, misioneros ukat tamanak tumptʼir jilatanakan luräwinakapar yanaptʼañatakix irtasiwayi.
Qhawqhanis jesusan jiwäwip amtasax vino umtʼapxatayna ukat tʼantʼsa manqʼapxarakitayna: 9.986
[9, 10 jananaka]
Qillqt’asiñataki