“Jutam nayar arkita”
1. ¿Jutïr phaxsinakanxa kunsa Taman Bibliat Yatxatañataki satäki uka tantachäwin yatiqañäni?
1 Jesusax kunanaksa aka Uraqin lurawayäna ukanakxa Mateo, Marcos, Lucas ukat Juan libronakax sum qhanañchistu. Taqi ukanak yatxatañax Jesusan ‘kayup arkañwa’ yanaptʼistu. Ukatwa“Jutam nayar arkita” satäki uka librompix marzo qalltat uksaruxa Taman Bibliat Yatxatañataki satäki uka tantachäwin yatiqañäni. Ukatakix taqiniw sum wakichasiñ muntanxa, ukat yatichäwinakapsa katuqañ munaraktanwa (1 Ped. 2:21; Mar. 10:21). Kunanaktï Jesusax lurkäna ukanak yatiñax Diosar sum luqtañwa yanaptʼistu.
2. ¿Jesusat yatiqasisax kunjamsa jan walinakan aguantsna?
2 Kunsa Jesusat yatiqsna. Utat uta yatiyir sarktan ukhaxa, yaqhipax janiw istʼañ munapkiti, awisax tuqisxapxakiwa. Ukhamanakanwa Jesusan arunakapat amtastanxa, jupax akham sänwa: “Nayarux uñisipxituwa, jumanakarux uñisipxarakïtamwa” sasa (Juan 15:20). Chiqas janiw taqinis uñisiñat tuqipkistuti. Ukampis ¿kunas aguantañ yanaptʼistaspa? Kuntï katuqañapäkäna uka amtaniw Jesusax taqi yantʼanakan aguantäna. Jiwasax ukham aguantaraksnawa. Diosar kusisiyañataki ukat Jupar luqtañataki taqi chuym chʼamachasiñäni ukhaxa, walja bendicionanak katuqañäni, uk amtañaw jan qariñatakisa ni pächasiñatakis yanaptʼistani (Heb. 12:2, 3; Pro. 27:11). Ukat Diosar taqi chuym luqtañäni ukhaxa, Jesucristox yanaptʼarakistaniwa (Mat. 28:20).
3. ¿Kunsa Jesusat yatiqasisax lurañasa?
3 “Ukataki khitanitarakïtwa.” Jesusatakix Diosan Apnaqäwipat yatiyañaw nayrankäna (Luc. 4:43). Taqi chuymaw Diosan arunakapat yatiyäna. Jupatakix uk lurañax wali wakisirïnwa, kawkinsa Diosan Apanaqäwipat yatiyaskakïnwa. Ukampis ¿jiwasat kamsaraksnasa? ¿Arkirinakapjamax kayup arkasktanti? Kun lurkasas jan ukax kawkinkkasasa, ¿yaqhanakar Diosan arunakapat yatiyasktanti? Criston munasiñapaw taqi jaqinakar Diosan arunakapat jukʼamp yatiyañatakix chʼamañchistu (2 Cor. 5:14).
4. ¿Kunjamatsa jaqinakar sum yatichsna?
4 “¡Janiw kunapachas khitis uka jaqjamax parlkiti!” Jesusan yatichäwinakap istʼasinxa, jaqinakax wal muspharapxäna (Juan 7:46; Mat. 7:28, 29). Janipuniw khitis jupjam suma yatichirix utjkänti. Kunattix yatichkäna uka chiqa yatichäwinakxa wali askit Jesusax uñjäna, istʼirinakaparux wali munasiñampiw kunayman tuqit sum yatichäna. Jiwasax jupat yatiqasisaw jaqinakar sum yaticharaksna (Luc. 6:40).
5. ¿Kuna amtampis“Jutam nayar arkita” siski uka librot yatiqañasa?
5 Akanxa mä qhawqhaki Jesusat parltʼawaytanxa. Ukampis walja suma yatichäwinakaw jupat utjaski. ¿Kunjamatsa ukanak jikxatsna? Taman Bibliat Yatxatañataki sat tantachäwinxa Jesusan sarnaqäwipat jukʼamp yatxatañäni. Ukhamax kuntï lurkäna ukat arskäna ukanak sum yatxatañataki chʼamachasiñäni, ukhamatwa ‘Criston munasiñap uñtʼapxañäni’ (Efe. 3:19).