Uraqpachan Jilïr Irpirinakan qillqanitapa
Munat jilat kullakanaka:
Jiwasanakatakixa, ¡taqi kunxaru munañani Jehová Diosan jachʼa sutip apañax wali askipuniwa! Sutipax jan kikpani, wiñayans wiyañayapatakiwa. Jehová Dios kikpaw sutip apañasatakix ajllisistu, 1931 maratwa uka sutimpi uñtʼatäxaraktanxa (Isa. 43:10). Chiqpachansa, Jehová Diosan Qhanañchirinakapjam uñtʼayasiñax wali askipuniwa.
Ñanqha Supayax Diosan sutip chhaqtayañatakix walpun chʼamachasi. Jupan apnaqat taqi markanakaw Diosan sutip uñisipxi. Jachʼa Babilonia, Uraqpach apnaqiri kʼari yupaychäwixa, Diosan sutipxa uñisiwa ukat Biblia yaqha arur jaqukipapki ukanakatsa Diosan sutip apsxapxarakiwa. Ukampisa, Jesusax Awkipan sutipxa jachʼarupuniw aptäna, arkirinakapar mayisiñ yatichkän ukhaxa, Awkipan sutip jachʼañchasiñapatakiw nayraqat mayïna. Jupax akham sänwa: “Alaxpachankir nanakan Awkixa, sutimax jachʼañchatäpan” sasa (Mat. 6:9). Ukat qhiparuxa, Awkipar taqi chuyma mayisisax akham sarakïnwa: “Sutimxa uñtʼaytwa akapachata churkista uka jaqinakaruxa” sasa (Juan 17:6, MT). Jesusat yatiqasisax Diosan sutipat aka Uraqpachar taqi chuymapuniw yatiyañ amtapxaraktanxa.
‘Suma yatiyäwinak taqinir yatiyapxañäni’ siski, uka 2009 marpachataki Bibliat apstʼat arunakawa taqiniru yatiyañasatakix chʼamañchtʼawayistu (Hech. 20:24). Chiqpachansa, 2008 septiembre phaxsit 2009 agosto phaxsi tukuykam wal chʼamachtʼasitasatxa Jehová Diosax walpun bendiciwayistu. Jehová Diosan sutip jachʼañchasiñapatakix aka Uraqpachanwa yatiyasiwayi. Suma chuyman jaqinakax akapachan jan waltʼäwinakapar atipjañatakix suma iwxtʼanakwa thaqhasipki ukanakaru ukat taqi jaqinakar yatiyañatakis 7.313.173 yatiyirinakaw pasïr marax yatiyasipkayätanxa. Jesusan jiwäwip amtañatakix 18.168.323 jaqinakaw tantachtʼasiwaytanxa, aka ñanqha pachan tukusiñapkamax millón millón jaqinakampiw Jehová Diosar jachʼañchasipkaspa, ukwa ukax uñachtʼayistu.
Jehová Diosax kawkikamay yatiyasiñap munchi ukhakamaw Apnaqäwipat suma yatiyäwinakxa taqi chuyma yatiyasipkakiñäni, yatiyktan uka chiqanakanxa kunaymanit yatiyañatakiw chʼamachasiñäni (Mat. 24:14; Mar. 13:10). Utat uta, callenakana, carta tuqnäma, telefonot jan ukax kawki chiqanakansa, qhawqha jaqinakaruy yatiyañjamächi ukanakarux Diosan sutipata, amtanakapatsa taqi chuyma yatiyañatak chʼamachasisipkakiñäni.
Jehová Diosax niyaw aka ñanqha pachar tʼunjani, ukhamatwa sutip jachʼañchani (Eze. 36:23). Niyaw Jupan sutip jiskʼachirinakax tukjatäpxani. Sutipat yatiyiri ukat jachʼakankañap tuqit saytʼasir jan jithiqtas luqtirinakapatakix uka urux kusiskañapunïniwa.
Uraqpachanxa walja markanakanwa 2009 maranx “Amuyasipxapunim” sat Kimsa Uru Jachʼa Tantachäwi ukat Walja Markanakat Jachʼa Tantachäwinakax apasiwayi, ukaw Jehová Diosax markapar munasiñamp uñjaskatapxa qhan amuytʼayistu. Uka jachʼa tantachäwinakax Diosan markapatakix wali wakiskiripunïnwa, Jehová Diosan jachʼa urup suyañax kunja wakiskirisa uk amuyapxañasatakiw taqiniru chʼamañchtʼawayapxistu (Mar. 13:37; 1 Tes. 5:1, 2, 4).
Chiqpachansa, Jehová Diosax wal munasistu, Jupaw jiwasanakarux kusisiyistu, suma chʼuxña pastonakar samartʼayistu, qʼuma uma thiyanakaruw awatistu (Sal. 23:1, 2; 100:2, 5).
¡Jutïr phaxsinakan irnaqtʼapkäta ukarux Jehová Diosax bendicisipkakïtamwa, uk janiw pächasipxañamäkiti!
Wali munasiñampi Uraqpachankir jilat kullakanakataki,
Jilatanakama,
Jehová Diosan Qhanañchirinakapan Uraqpachan Jilïr Irpirinakapa
[5-8 jananakan tablapa]
JEHOVÁ DIOSAN QHANAÑCHIRINAKAPAN IRNAQÄWIPA (SEPT. 2008-AG. 2000)
(Sumpach amuytʼañatakix qillqatan mistki uk uñxatañamawa)
2008 septiembre phaxsit 2009 agosto tukuykamaxa, 140.000.000 dólares ukha qullqwa precursores especiales, misioneros ukat tamanak tumptʼir jilatanakan luräwinakapar yanaptʼañatakix irtasiwayi.
Qhawqhanis jesusan jiwäwip amtasax vino umtʼapxatayna ukat tʼantʼsa manqʼapxarakitayna: 10.857
[9, 10 jananaka]
Qillqt’asiñataki