Wali kusiskañ irnaqäwi
1. ¿Kuna luräwis jichhürunakan apasiski?
1 Nayrïr patak maranakanxa, khitinakatï jaqinakar qullata uñjapxäna ukanakax wali kusisitapuniw jikxatasipxäna (Luc. 5:24-26 NM). Jichhürunakanxa, Jehová Diosar uñtʼapxañapatak yanaptʼasipki uka luräwiw ukham wal kusisiyarakistuxa (Apo. 22:1, 2, 17). Bibliasa ukat qullan ajayus kunjamsa jakäwipan jaqinakar yanaptʼaski uka experiencianak liytʼañax ¿wali kusiskañapunixaya? Ukampisa, maynir Bibliat yatichaña ukat Diosar yupaychañ tuqit nayrar sartañapatak yanaptʼañaw jukʼampi kusiskañaxa.
2. Chiqa yatichäwinak maynir yatichktan ukhaxa, ¿kunjamsa jikxatassna?
2 ¿Kuna sutinis Diosaxa? ¿Kunatsa tʼaqhisiñanak ukhamak uñjaskpacha? ¿Kunsa Apnaqäwipax jaqinakatak lurani? Ukham jisktʼanakxa wali kusisitaw qhanañchtanxa, ukat yatiqirix chiqa yatichäwinak yatiqasax kunja kusisitas jikxatasi uk uñjañaw jukʼamp kusisiyistu (Pro. 15:23; Luc. 24:32). Ukat jukʼamp yatxataskaki ukhaxa, Diosan sutips aytxi, janiw nayrjam isisxiti, jan wali luräwinakapsa apanukxi ukat yaqhanakarus Diosats yatiyxarakiwa. Diosar jakäwip katuyasxi ukat bautisasxi ukhaxa, jilatasäxiwa ukat mä yanaptʼirïxarakiwa. Ukanak lurir uñjañax wali kusiskañapuniwa (1 Tes. 2:19, 20).
3. ¿Kunsa Bibliat mä yatiqirinïñatakix lurañasa?
3 ¿Yanaptʼasmati? Jumatï uka kusiskañ irnaqäwin yanaptʼañ munsta ukhaxa, Bibliat mä yatiqirinïñatakix Jehová Diosaruw yanap mayisiñama ukat uka mayisitamarjamaw luräwinakamamp uñachtʼayañama (1 Juan 5:14). Jaqinakarux kawkhansa ukat kunapachasa yatiyapunim. Wakisirjamäni ukhaxa, ¿jumax Bibliat yatiqañ munasmati? sasin jisktʼapunim (Ecl. 11:6). Ukat Bibliat yatiqañ munani ukhaxa, kuttʼañamapuniwa (1 Cor. 3:6-9).
4. ¿Kunatsa Bibliat yatiqirinakarux jankʼak thaqañasapuni?
4 “Khitinakatix Diosan munañaparjam sarnaqañat awtjayasipxi, pharjayasipxaraki ukanakaxa” waljaw utjaski. ¿Khitis jupanakarux Diosar uñtʼapxañapatak yanaptʼani? (Mat. 5:3, 6.) Janïr akapach tukuskipanxa, Diosan Arupat yatiyañ phuqasiñapataki ukat jaqinakar Jesusan arkirip tukuyañatakix taqi chuympun yanaptʼapxañäni (Isa. 6:8).