¿Kunas suma yatichirïñasatakix munasi?
1. ¿Kunsa suma yatichirix uñachtʼayañapa?
1 ¿Kunas maynirux Bibliat suma yatichiriru tukuyaspa? ¿Jachʼa yatiqañ utanakar saraña? ¿Expariencianïña? ¿Wali suma yatichañ yatiña? Janiwa. Jan ukasti munasiñaw wakisi, uka munasiñaw taqpach kamachinak phuqañ yanaptʼi ukat ukarakiw Jesusan chiqpach arkirinakapätas uñachtʼayi. Ukat Jehová Diosanxa, uka munasiñaw jilankaraki (Juan 13:35; Gál. 5:14; 1 Juan 4:8). Ukhamaxa, suma yatichirïñasatakix munasiñwa uñachtʼayañasa.
2. ¿Kunatsa jaqi masisar munasiñax wakisi?
2 Jaqinakar munasiña. Suma Yatichiri Jesusax wal jaqinakar munasïna ukatwa jaqinakax istʼapxäna (Luc. 5:12, 13; Juan 13:1; 15:13). Jiwasatï jaqinakar munasiñänixa, kawkhankkasas khitirus yatiyaskakiñäniwa. Jaqix janisay istʼañ munapkchistani, arknaqapkchistanisa jan ukax yaqha ukham jan walinakans jikxataskchiñänixa, janipuniw kunas jarktʼkistaniti. Ukat yatiyktan jupanakarus wali munasiñampiw istʼañäni ukat ukarjamaw Bibliat yatiyarakiñäni. Ukhamarusa, Bibliat yatichir sarañatakisa ukat wakichtʼasiñatakis tiempo apstʼasirakiñäniwa.
3. Biblian yatichäwinakaparu munasiñaxa, ¿kunjamsa yatiyañatakix yanaptʼistani?
3 Biblian yatichäwinakaparu munasiña. Jesusax Biblian yatichäwinakaparux munasirakïnwa. Ukat wali valorani yänakarjamaw uñjäna (Mat. 13:52). Jiwasatï Biblian yatichäwinakap munasiñäni ukhaxa, wali kusisitaw yatiyañäni ukat ukhamarakiw istʼirinakasax jikxatasipxani. Uka munasiñarakiw jan axsaras yatiyañatak yanaptʼistani, kunattix janiw jiwas pachpat llakiskañäniti jan ukasti kunja wakiskiris Diosan arunakap yatiyañax uka tuqitwa llakiñäni.
4. ¿Kunjamatsa munasiñanïssna?
4 Kunjamatsa munasiñanïsna. Kunjamas jaqinakax ajay tuqit jikxatasipxi ukat kunjamsa Jehová Diosasa ukat Yuqapas munasiñ uñachtʼayistu ukanakat lupʼisawa jaqinakar munassna (Mar. 6:34; 1 Juan 4:10, 11). Ukhamarusa, sapa kuti sapak Bibliat yatxatañäni ukat ukanakat lupʼiñäni ukhaxa, Diosan arunakaparux jukʼampiw munasiñäni. Ak amtapuniñäni: munasiñax qullan ajayun luräwinakapat maynïriwa (Gál. 5:22). Ukhamasti, munasiñanïñatakixa Jehová Diosaruw yanapapa ukat qullan ajayup mayiñasa (Luc. 11:13; 1 Juan 5:14). Janisay jachʼa yatiqañ utanakar sarkstan ni expariencianïsktansa jan ukax janis wali sum yatichañ yatkstanxa, munasiñtï uñachtʼayañänixa taqiniw Bibliat suma yatichiriñäni.