Oraqpachan Jilïr Irpirinakan qellqanitapa
Munat jilat kullakanaka:
¡Jehová Diosan Qhanañchirinakapajj aka Oraqpachanjja, paqallq millonats jiläjjapjjtanwa. Taqe jumanakar wasitampi carta qellqaniñajj wali kusiskañapuniwa! ¿Kunjamsa yaqha markat jutapki uka jilat kullakanakar uñtʼasajj jikjjatasipjjerïta? Cheqas wali kusisitaw munasiñampi katoqapjjtajja (Juan 13:34, 35). Ukhamarakiw anuarion experiencianakajj utjki uk liytʼasajj jikjjatasipjjäta. Ukanjja kunayman markankir jilat kullakanakajj kunjamsa Jehová Diosar jan jitheqtas loqtapjje ukaw qellqata.
Familiana Diosar Yupaychañataki Aruma sat wakichäwjja jumanakatjja waljaniw wali askit uñjasipktajja. Ukat jiskʼa wawanakaman jan qarjasiñapatakisa, kunaymanitwa yatichañatakejj chʼamachasipjjtajja, uk yatiñajj nänakatakejj wali askiwa (Efe. 6:4). Ukat khitinakatï jaqechatäpki ukanakarusa uka wakichäwejj jukʼampiw chacha warmjam Bibliat sum yatjjatañatakejj chʼamañcharaki (Efe. 5:28-33). Cheqansa taqeniw familpachasa jan ukajj sapakisa Bibliat yatjjatasajj chʼamañchata jikjjatastanjja (Jos. 1:8, 9).
Khitinakatï jan waltʼäwinak utjipan yänakaps aptʼasipjje jan ukajj familiaps aptʼasipjje ukanakatsa wal sintʼasipjjarakta. Ukat jan pächasis jankʼaki ukar yanaptʼañataki tiempo apstʼasiwayapjje uka jilat kullakanakarus walpun yuspärtʼapjjasma (Hech. 11:28-30; Gál. 6:9, 10). Maysa toqetjja jumanak taypinjj Dorkas kullakjamaw ‘aski luräwinak’ lurapjjta, ukat tama taypinkir jilat kullakanakar yänakampi yanaptʼañatakis jankʼakïpjjaraktawa (Hech. 9:36). Jan khitin jariyata ukham lurapjjatamatjja, Jehová Diosajj bendisipjjatamwa (Mat. 6:3, 4).
Yaqhep markanakanjja, Jehová Diosan arunakap yatiyasiñapjja janiw munapkiti, leyinaksa takichasiwayapjjewa, uk jumanakajj sum uñjawayapjjtajja (Sal. 94:20-22). Ukampis kuntï Jesusajj aka qhepa urunakatak siskäna uk jumanakajj sum amuyapjjtajja, ukatwa jan ajjsartʼasa aguantasipkta ukat Jehová Diosarus atinisipjjarakta (Juan 15:19, 20). Ukat jumanak laykus oracionanakajanjja Jehová Diosarojj mayipjjapuntwa, ukat “khitinakatejj jumanakaru suytʼañanakamjjat jisktʼapkätam” ukanakar jan ajjsartʼasa parlapjjañamatakis mayipjjaraktwa (1 Ped. 3:13-15).
Akapachanjja, Supayajj jan wali qʼañu luräwinakaruwa wiyti, ukhamäkipansa uka jaqenak taypinjja millón millón jilat kullakanakaw sarnaqäwinakamanjj qʼoma sarnaqapjjtajja, walikpun ukham lurapjjtajja. Jichhürunakanjja, janiw qʼoma sarnaqañajj utj-jjeti, ukampis jumanakajja ‘chʼamañchasisipktawa Tatitumpi, ukhamarak jachʼa chʼamapampisa’ (Efe. 6:10). Ukat ‘taqe armanak Diosajj churapktam ukampiw Supayan kʼari arunakaparu atipjañataki’ jarkʼaqasipjjtajja (Efe. 6:11, 12). Jehová Diosajja, jumanakan suma sarnaqäwinakamampiwa Supayarojj saykati uk janipun armasipjjamti (Pro. 27:11).
Ukat maysa toqetjja, 2011 maratjj aka suma yatiyäwinak katoqapjjta, Jesusan jiwäwip amtañatakejj 19.374.737 jaqenakaw tantachasiwayapjje. Abril phajjsin jilat kullakanakajj precursor auxiliarjam irnaqtʼawayapki taqe ukanakarakiw ukham waljani tantachasiñatakejj yanaptʼawayi. Ukham lurasajja, oraqpachanwa Jehová Diosar jukʼamp jachʼanchasiwayi (Rom. 10:18). Uka phajjsinsti 2.657.377 jilat kullakanakaw precursor auxiliarjam irnaqtʼawayapjje. Ukat yaqha jilat kullakanakasa ukhamarakiw wal chʼamachasiwayapjje, ukham wali kusisita ukat jankʼak irnaqtʼapjjatamajja nänakarojj wal kusisiyapjjetu (Sal. 110:3; Col. 3:23).
Jehová Diosan yanaptʼapampejj pasïr marajj 263.131 ukhaniw bautisasiwayapjje. Ukat Apocalipsis 22:17 qellqatanjj mä invitacionaw jikjjatasi, ukanjja akham siwa: “Qollan Ajayumpi Corderon esposapampisti siwa: ‘Jutam’. Istʼirïki ukasti sarakpan ‘Jutam’ sasa. Khititejj umat pharjayaski, ukat um munkaraki ukajj jutpan, jakañ umat inak umtʼarakpan” sasa. Uka arunak phoqañatakejj jumanakajj sum yanaptʼawayapjjestajja, ukajj wali askiwa. Ukat kunatï kimsür jachʼa tantachäwin 2011 maran apaskän ukanjja, kunjamsa Diosan Reinopajj yanaptʼistaspa ukanak walja toqenakatwa yateqawaytanjja, ukat jukʼampiw taqe chuyma akham sistanjja “Reinomampisti Apnaqapjjeta” sasa. Ukat Apóstol Juanarojj Jesusajj akham sarakïnwa: “Nayasti jankʼakiw jutä” sasa. Ukat jupajj akham sarakïnwa “ukhamäpan. ¡Jutaskakim, Tatit Jesús!” sasa. Jiwasanakajj ukhamarakiw sistanjja (Apo. 22:20).
Kunanakatï jutïr urun paskani ukjja pacienciampiw suytʼasipktajja, ukat Jehová Diosar ‘cheqpach munasipjjatamjja luräwinakamanwa uñachtʼayapjjtajja’. Jumanakarojj walpun munasipjjsma munat jilat kullakanaka, uk janipun armasipjjamti (1 Juan 3:18).
Jilatanakama,
Jehová Diosan Qhanañchirinakapan Oraqpachan Jilïr Irpirinakapa
[5-8 jananakan tablapa]
JEHOVÁ DIOSAN QHANAÑCHIRINAKAPAN IRNAQÄWIPA (SEPT. 2010-AG. 2011)
(Sumpach amuyt’añatakejj qellqatan mistki uk uñjjatañamawa)
2010 septiembre phajjsit 2011 agosto tukuykamajja, 173.000.000 dólares ukha qollqwa precursores especiales, misioneros ukat tamanak tumptʼir jilatanakan luräwinakapar yanaptʼañatakejj irtasiwayi.
Qhawqhanis jesusan jiwäwip amtasajj vino umtʼapjjatayna ukat tʼantʼsa manqʼapjjarakitayna: 11.824
[9, 10 jananaka]
Qellqt’asiñataki