Jisktʼäwinaka

◼ Maynitï janïr jiwkasin taqpach jan ukajj chikat yänakap Jehová Diosan markapar jaytañ munchi ukhajja, ¿kuna toqets sum amuytʼasiñapa?

Kunapachatï maynejj jiwjje ukhajja, janiw yänakapampejj kuns lurjjaspati (Ecl. 9:5, 6). Ukatwa walja jaqenakajj janïr jiwkasin kunjamsa yänakap jaljañ munapjje taqe ukanakatakejj abogadon firmata mä testamento jan ukajj minuta lurapjje ukat ukjja Notario de Fe Pública ukampirakiw selljjatayapjje (2 Rey. 20:1). Ukatjja khitis jaljani jan ukajj uka documentonak phoqhayani ukas ukan qhanañchasirakiwa. Ukat walja markanakansti, maynitï jan documento lurawaykasin jiwjjchi ukhajja, marka apnaqerinakaw kunjams yänakap jaljasini ukjj amtjjapjje. Ukhamajj inas yänakas Jehová Diosan markapar jaytañ amtaskstan, ukhamächi ukhajja, mä suma documentwa lurañasa ukat khitisa yänakas jaljani uksa sumwa ajlliñasaraki.

Ukat yänak jaljañatak ajllitäki ukajj chʼama luräwiniwa, kunattejj yänak apthapisajja jaljañaparakiwa. Ukanak lurañatakejj tiempow munasi, kunattejj tramitenak lurañapawa. Ukampis marka apnaqerinakasa, sapa kutiw kunjams lurasiñapa uk mayipjjaraki. Janiw tamankir jilat kullakatap laykukejj yänak sum jaljani sasajj sisksnati. Jan ukasti, suma yatjjattʼata, atiniskaña ukat jiwirejj kunjamtï amatawaykän ukarjam phoqheriruw ajllisiñapa (Uka toqet jukʼamp yatjjatañatakejja, “Los beneficios de la planificación patrimonial” siski ukwa ¡Despertad! del 8 de diciembre de 1998 revistan uñjjattʼäta). Ukat abogadon firmat testamento jan ukajj minutjja, mä copia apsusajj Jehová Diosan markaparuw aptʼayañama.

Yänak jaljirejj kun lurañapasa. Maynitï janïr jiwkasin yänakap uñjiritak jaytawaystam ukhajja, nayraqat sum amuytʼasiñama ukat Diosar oración maytʼasjjasinjja phoqherjamätat janich uk amuytʼasiñamarakiwa (Luc. 14:28-32). Ukat kunaratutï yänakap jaytirejj jiwjjani ukhajja, khithinakarutï yänak katoqañajj waktʼki ukanakarojj yatiyjjañamawa. Ukatsti jumarakiw leyirjama ukat testamento qellqatarjamajj sapa maynir jalanoqjjañama. Jaljiritak ajllitäpki ukanakajj janiw kunäkipansa documentonak utjki ukanak mayjtʼayapjjañapäkiti, jukʼachisa jan ukajj waljachisa ukarjamaw sum jaljapjjañapa, kunjamtï jiwirejj munkäna ukarjama. Ukat khitinakatï Jehová Diosan Qhanañchirinakapan sutipjjar yänakap jaytapki taqe uka yänakajja, Jehová Diosan markapankjjewa (Luc. 16:10; 21:1-4).