Conciencias jarkʼaqasipjjañäni

1. Mä uru jachʼa tantachäwejj 2012 maran septiembre phajjsit 2013 agosto phajjsikam apaskani ukajja, ¿kuna pʼeqeñchäwinïnisa ukat kuna amtamp wakichtʼatasa?

¹ Sapürunjamaw kunayman toqet chuymasajj mä arunjja concienciasajj yantʼat uñjasi. Mä uru jachʼa tantachäwejj 2012 maran septiembre phajjsit 2013 agosto phajjsikamaw apasiskani, ukajj “Conciencias jarkʼaqasipjjañäni” sat pʼeqeñchäwinïniwa (1 Tim. 1:19, NM). Kuntï Diosajj churawaykistu uka concienciasajj kunjamäskis uk sum amuytʼasiñasatakiw uka wakichäwejj wakichtʼata.

2. ¿Kuna jisktʼanakarus uka tantachäwin qhanañchasiskani?

² Aka jisktʼanakaruw qhanañchasiskani. Uka tantachäwinjja, paqallqo jisktʼanakaruw conciencia toqet qhanañchasiskani:

• ¿Kunanakas concienciasar qʼañuchaspa?

• ¿Kunas concienciasar sum yatichañatakejj yanaptʼistani?

• ¿Kunjamatsa jaqenakan jiwapjjatapat jan juchanïksna?

• Biblian yatichäwinakapat lupʼisasa ukat ukarjam sarnaqasasa, ¿kuns uñachtʼaytanjja?

• ¿Kunjamatsa mayninakan concienciap jan mayjtʼayksna?

• ¿Kunjamsa wayn tawaqonakajj yantʼanakan uñjaskasas saytʼatäsipkakispa?

• Bibliarjam yatichat concienciapar istʼapki ukanakajj ¿kuna askinaksa jikjjatapjjani?

3. ¿Kunjamatsa mä uru jachʼa tantachäwit askinak apssna?

³ Supayajja, kunaymanitwa conciencias qʼañuchañatakejj chʼamachasi, ukampis Jehová Diosaw uka yantʼanakapar saykatañatakejj yanaptʼistu. Arup toqe ukat markap toqew alajjpachankir wali munasir Awkisajj akham sistu: “Aka cheqaw thakejja, sarasipkakim” sasa (Isa. 30:21). Ukat mä uru jachʼa tantachäwi toqerakiw Diosajj yatichistu. Ukhamajja, uka tantachäwinkañatakejj chʼamachasipjjapuniñäni. Sumarak istʼañäni ukat kunjamsa uka yatichäwinakarjam sarnaqsna uksa amuytʼasirakiñäni. Ukatjja, yateqaniwayktan ukjja, familiasampiw amuykiptʼaraksna. Jehová Diosan ewjjanakaparjam sarnaqasajja, janiw akapachan qʼañu luräwinakapampi conciencias qʼañuchaskañäniti (1 Ped. 3:16).