‘Taqenir yatiyapjjañäni’
1. ¿Kuna wakiskir uñachtʼäwsa apóstol Pablojj jaytawayistu?
1 “Lurañanakamjja sumrak phoqham.” (2 Tim. 4:5.) Apóstol Pablojja, jan ajjsarasaw uka arunak Timoteor säna, kunatejj jupaw luräwipamp uñachtʼayäna. Cheqansa 47 ukat 56 jichha pacha maranakanjja, kimsa kutiw misionerjam viajäna. Ukat apóstol Pablojj ‘taqeniruw yatiyäna’ jan ukajj phoqhatpachwa Diosan arunakap yatiyäna sasaw Hechos libronjj qhanañcharaki (Hech. 23:11, NM; 28:23). ¿Kunjamsa jupat yateqasiraksna?
2. Utat uta yatiykasajja, ¿kunjamsa taqenir yatiysna?
2 Utat uta yatiykasa. Yaqhepanakajja, janipuniw Diosan suma yatiyäwinakap istʼapkiti, jupanakar jikjjatañatakejj inas yaqha horasar yatiyir sarañ wakischispa. Jaypʼunakaru jan ukajj seman tukuyaru mistsna ukhajja, inas familian peqtʼirinakaru jikjjataraksna. Ukat utat uta yatiykasajja utanir jikjjatañatakejj chʼamachasiñasapuniwa, ukatakejj jan utapan jikjjatktan ukanakjja, qellqaqtʼasiñasawa ukat yaqha horasaruw sarañasa. Ukat janipuni jikjjatkañäni ukhajja, telefonot inas jawsna jan ukajj mä carta qellqtʼasin jaytaraksna.
3. Callenkasasa jan ukajj kawkhankkasasa yatiyañ toqet ¿kuns lurasma?
3 Callenakana ukat taqe cheqan yatiykasa. Jehová Diosan Qhanañchirinakapjamajja, ‘cheqpach yatiñwa’ khitinakatï istʼañ munapki ukanakar yatiytanjja. Awisajj “callenakana”, jan ukajj ‘plasanakanwa’ yatiytanjja (Pro. 1:20, 21). Ukat kawkhankkasasa, kun lurkasasa yatiyaraktanwa. Ukhamatwa ‘Tatitun arunakap parlañaruw uchasta’ sasajj sissna (Hech. 18:5). Ukat ‘taqenir yatiyañasäki’ uksa phoqharaksnawa (Hech. 10:42, NM; 17:17; 20:20, 21, 24).
4. ¿Kunjamsa Jehová Diosat mayisiñasa ukat lupʼiñas taqenir yatiyir sarañatakejj yanaptʼistaspa?
4 Yaqhep pachajja, ajjsarasaw jan ukajj usutäsaw Diosan arunakap jan yatiyksnati, ukampis Jehová Diosajj taqe ukanakajja, sum yatistu (Sal. 103:14). Ukham jikjjatasiñäni ukhajja, Jehová Diosaruw jan ajjsarasa yatiyañatakejj yanaptʼap mayiñasa (Hech. 4:29, 31). Ukat Bibliat sapak yatjjatkasajja, yatiyir sarañajj kunja wakiskirisa uka toqet lupʼiñasarakiwa (Fili. 3:8). Ukhamatwa yatiyir sarañjja, wali wakiskirit uñjañäni ukat taqe chuymaw kusisita yatiyarakiñäni.
5. Joel libron parlki uka profecianak phoqhasiñapatakejj ¿kunjamsa yanaptʼsna?
5 Jehová Diosan jachʼa urupa janïr purinkipanjja, markapajj jan inaktʼasaw Diosan arunakap yatiyaskani ukat janirakiw kunas saytʼaykaniti sasaw Joel libronjj qhanañchi (Joel 2:2, 7-9). Ukhamajja, uka aski luräwjja taqe chuyma phoqhaskakiñäni, kunattejj janiw mayampis uka pachpa luräwejj utj-jjaniti.