Oraqpachan Jilïr Irpirinakan qellqanitapa
Munat jilat kullakanaka:
Alajjpachankir Jehová Dios awkisajj wali munasiriwa. Ukatwa Biblianjj “Diosajj munasiñawa” sasin qhanañchi (1 Juan 4:8). Jupajj Taqe chʼaman Diosawa, ukampis Biblianjja janiw “Diosajj chʼamawa” sasin siskiti. Cheqas apnaqäwipajja, munasiñjjar uttʼayatawa ukatwa Jupar jakʼachasiraktanjja.
Jehová Diosajj janiw “Nayarupun yupaychapjjetäta” sasin maykistuti. Jan ukasti, Jupar taqe chuyma munasitas layku yupaychsna ukwa muni. Ukhamatwa Jupamp apnaqatäñ munatas uñachtʼayañäni, kunattejj munasiri ukat cheqapar apnaqer Diosawa. Ukhamätapjja qalltatpachwa amuyasïna.
Jehová Diosajj janiw Adanampi ukat Evampejj munkir jan munkir istʼayaskänti, jan ukasti jupanakaw kun lurañs amtapjjasapäna. Jupanakatï Diosar cheqpachapun munasipjjasapäna ukat kunatï jupanak layku lurawayki ukanakat yuspärapjjasapäna ukhajja, janiw Supayar istʼapkasapänti.
Walja maranak qhepatjja, Moisesajj qhep qhepa arstʼäwipanjja akham sasaw israelitanakarojj säna: “Uñjapjjam, jichhüruw ajllisiñamataki churapjjsma, mä toqetjja jakañampi, suma sarnaqañampi; mä toqetsti jiwañampi jan waltʼañampiraki” sasa (Deu. 30:15). Cheqas kunjamas jakasipjjani ukjja, israelitanakaw amtapjjañapäna. Josué chachajj ukhamarakwa israelitanakarojj säna: “Ukampisa janitï jumanakajj [Jehová] Diosar serviñ munapksta ukajj, jichhüruy ajllisipjjam khitirutï servipjjata uka” sasa. Ukat israelitanakajj akham sapjjänwa: “Diosajj jan munpati jiwasan juparu apanukuñasjja, yaqha diosanakar serviñataki” sasa (Jos. 24:15, 16). Jiwasajj ukhamarakiw amuytanjja, Jehová Diosar wal munastanjja, janipuniw Jupar ‘apanuksnati’.
Cristianonakjamajja, amtasarjam sarnaqaña siski ukjja, kamsañs muni uk sum amuytanjja. Cheqas irpir chuymaninakajja, wakisi ukhajj ewjjtʼapjjestaspawa ukat cheqañchtʼapjjarakistaspawa, ukampis janiw jakäwisjja ukat iyawsäwisjja munañapar apnakapkaspati. Apóstol Pablojj akham sasaw qellqäna: ‘Janiw nanakajj iyawsañanakamarojj kun sañs munapksmati, jumanakasti iyawsañanakamanjj suma thurtʼatäjjapjjtawa. Ukhamïpansti, yanaptʼirinakakïpjjtwa ukhamat kusisiñanïpjjañamataki’ sasa (2 Cor. 1:24).
Kunapachatï munkir jan munkir kuns lurtan ukhajja, janiw kusisit chuymamp lurktanti. Ukampis munasiñatwa kunatï askïki uk lurañatak Jehová Diosajj mayistu. Ukham lurañajj kunja wakiskirisa ukjja, apóstol Pablon arsutapanwa amuysna: “Taqe yanakajjtejj lakinoqasjjerista, pachpa janchejjsa nakhantatäñataki katuyasirista, ukatsti janirak munasiñajj utjkitaspajja, janiw kunatakis uka luratajjajj askïkaspati” (1 Cor. 13:3).
Jehová Diosar taqe chuyma munasipjjatapatwa, walja millón millón jilat kullakanakajj jupar yupaychasipki, uk yatiñajj wali kusiskañawa ukat Diosarojj wal jachʼañcharaki.
Jehová Diosajj taqe servirinakaparuw wal munasiraki. Wawanaka, wayn tawaqonaka, khitinakatï akapachar munañat sipansa Jehová Diosar wal munasipkta, taqe jumanakaruw Jehová Diosajj wali munasiñampi uñjapjjaraktam. Nänakas wal munasipjjaraksma (Luc. 12:42, 43).
Wayn tawaqonaka, jilat kullakanaka Jehová Diosar wal munasipjjatam laykuw pasïr marajj 1.748.697.447 horanak Diosan arunakap yatiyawayapjjtajja. Ukat Diosar munasipjjatap laykuw 7.782.346 jilat kullakanakajj aka Oraqpachan Jehová Diosar serviwayapjje. Ukat 268.777 machaqanakaw jakäwip Diosar katuyasisa bautisasiwayapjje, uka taypinjja walja wayn tawaqonakaw utjawayi. Mä arunjja, sapa sabadompi ukat domingompejj 5.168 bautisasipkaspäna ukhamänwa. ¿Janit uk yatiñajj wali kusiskañäki?
Aka qhepa urunakanjja, Jehová Diosan yupaychirinakapajj walja jan waltʼäwinakanwa jikjjatastanjja, sañäni: arknaqataw uñjastanjja, usuntaraktanwa ukat walja jilat kullakanakaw chuymankipstatäsajj tʼaqhesipjjaraki. ¡Ukampis janiw kunäkipansa aynachtʼkañäniti! Wali munasiñampiw aruntanipjjsma (Heb. 10:39; 2 Cor. 4:16).
Jilatanakama,
Jehová Diosan Qhanañchirinakapan Oraqpachan Jilïr Irpirinakapa
[5-8 jananakan tablapa]
JEHOVÁ DIOSAN QHANAÑCHIRINAKAPAN IRNAQÄWIPA (SEPT. 2011-AG. 2012)
(Sumpach amuyt’añatakejj qellqatan mistki uk uñjjatañamawa)
2011 septiembre phajjsit 2012 agosto tukuykamajja, 184.000.000 dólares ukha qollqwa precursores especiales, misioneros ukat tamanak tumptʼir jilatanakan luräwinakapar yanaptʼañatakejj irtasiwayi.
qhawqhanis jesusan jiwäwip amtasajj vino umtʼapjjatayna ukat tʼantʼsa manqʼapjjarakitayna: 12.604
[9, 10 jananaka]
Qellqt’asiñataki