Jehová Diosar jakʼachasipjjañäni sat librotjja enero 6 urutwa yatjjatañ qalltañäni
1. Jehová Diosar jukʼamp jakʼachasiñatakejj ¿kunsa enero 6 urut luraskañäni?
1 Jehová Diosajj Jupar jakʼachasiñaswa muni (Sant. 4:8). Ukatwa Jehová Diosar jakʼachasipjjañäni sat libro Taman Bibliat Yatjjatañataki sat tantachäwinjja enero 6 urut yatjjatañ qalltaskañäni. Kuna amtampis uka librojj wakichasiwayi uka toqet akham sasaw qallta janapan qhanañchi: “Jiwasatï [Diosajj kunjam Diosäkitï] ukanakat lupʼiñäni ukat Jesucristo Yoqapajj kunjamsa aka Oraqenkkasajj ukanak uñachtʼayäna, kunsa jiwasajj yateqassna ukanaksa lupʼirakiñäni ukhajja, jukʼampiw Diosar jakʼachasiñäni” sasa. Uka librojja 2004 ukat 2005 maranakanwa tamanakan yatjjatasiwayi. Ukampis ukhat jichhakamajj pä millón ukhanimpiw Jehová Diosan markapar mantawayapjje, ukhamajj jichhaw jupanakajj Jehová Diosajj kunjam Diosäkiti uk sum yatjjatapjjani. Ukat khitinakatï uka librot yatjjatawayapki ukanakarojj Jehová Diosar jukʼamp munasipjjañapatakiw yanaptʼarakini (Sal. 119:14).
2. Jehová Diosar jakʼachasipjjañäni sat librot ¿kunjamsa yatjjatasiskani?
2 ¿Kunjamsa yatjjatasiskani? Tantachäwi sarayir jilataw mä qawqha arunakampi parlañ qalltani. Libronjja, Bibliat apstʼat kawkïr tʼaqanakas liytʼasini ukajj janiw qhanañchaskiti, ukhamajja tantachäwi sarayir jilataw kawkïris liytʼasini uk amuyjjani. Ukat sapa yatichäwi tukuyatarojja, amtañatakejj maya jan ukajj pä jisktʼanakwa jilatajj jisktʼarakispa. Ukat “Lupʼiñataki” siski uka recuadro utjani ukhajja, uka recuadrompiw amtañatakejj jisktʼaspa. Tiempo utjaskchi ukhajja, recuadron Biblian jiskʼa tʼaqanakapajj utjki ukanakat mä qawqha liytʼayaspawa ukat arstʼanipjjañapatakejj yaqha jisktʼanakwa jisktʼaspa.
3. Librot yatjjatkañäni ukhajja, ¿kunsa lurañasa, ukat kunatsa?
3 Askinak apsupjjañäni. Jichhakis yatjjataskchiñäni jan ukajj yatjjatawayjjstansa, tiempökipanwa wakichtʼasiñasa. Tantachäwinsa arstʼañasarakiwa, ukhamatwa Jehová Diosar jachʼañchañäni ukat kuntï yateqawayktan uksa amtarakiñäni, ukat tantachasirinakas askinak apsupjjarakiniwa (Sal. 35:18; Heb. 10:24, 25). Jehová Diosajj kunjam Diosäkitï uka toqet lupʼiñäni ukhajja, jukʼampiw Jupar jakʼachasiñäni (Sal. 77:11-13). Ukat ukarakiw mandamientonakap istʼañataki ukat yaqhanakar parlañataki yanaptʼistani (Sal. 150:1-6).