Jichhak bautisasipki ukanakar jan aynachtʼapjjañapatak yanaptʼañäni

Jehová Diosajj kunjamsa markapar bendisiski uk uñjañajj kusiskañawa (Deu. 28:2). Sapa marajj 250.000 jila jaqenakaw bautisasipjje. Mä yateqerejj bautisasjje ukhajja, Bibliat yatichirejj inas yaqhanakar yanaptʼañ laykojj ukharuki Bibliat yatichañ jaytañ munchispa. Jan ukajj yateqeriw bautisasjjasin jaqenakar jukʼamp yatiyañ laykojj Bibliat yateqañ ukharuk jaytañ munjjaspa. Ukampisa yateqerinakajj ajay toqet suma saytʼatäpjjañapajj wali wakiskiriwa. Jupanakajja, Criston ‘saphintatäñapawa, jupjjaru suma uttʼatäpjjañapataki iyawsäwi layku’ (Col. 2:6, 7; 2 Tim. 3:12). Ukhamajja, bautisasjjapjje uka yateqerinakajja, Kunsa yatichi ukat “Diosan munasiñapa” sat libronak tukuyañkamaw yateqasipkakiñapa (Diosan Apnaqäwipat Yatiyañataki, abril 2011, 2 jana uñjjattʼäta).