Oraqpachan Jilïr Irpirinakan qellqanitapa

Nanakamp chik irnaqtʼir munat jilat kullakanaka:

Aka 2014 wali wakiskir qallta maran jumanakar qellqanïñajj wal askipuniwa. Maysa toqetjja aka 2014 mara janïr tukuykipanjja, Jesucristo Reyisajj niya 100 maranakaw uñisirinakap taypin apnaqjjani (Sal. 110:1, 2).

Watch Tower Bible and Tract Society of Pennsylvania corporacionan sapa mara tantachäwip apaski ukanjja, pasïr 2013 marajj octubre phajjsinwa Traducción del Nuevo Mundo sat Biblia jaqokipirinakajj taqenin amuytʼañjamäki uka Bibliat (Traducción del Nuevo Mundo) mayamp sum uñakiptʼasin inglés arut machaq Biblia apsuwayapjje. Traducción del Nuevo Mundo jaqokipaskäna ukhatjja, sojjta tunka jila maranakaw pasawayjje, Jehová Diosaw qollan ajayump ajllit wawanakap toqe uka Biblia lurasiñapatak yanaptʼawayäna (Rom. 8:15, 16). Ukatwa uka Bibliajj wali wakiskiripuniwa sasin sissna.

Oraqpachan Jilïr Irpirinakat khitinakatï Qellqerinakan Uñjirinakapäpki jupanakaw Biblia walja arunakar jaqokipasiñapatak wal chʼamachasiwayapjje. Jichhürunakanjja, Traducción del Nuevo Mundo Bibliajj phoqatpachasa jan ukajj chikatakisa 121 arunakaruw jaqokipasiwayi. Ukhamajja, jumanakatakejj Bibliajj qawqha wakiskirisa uk Jehová Diosar uñachtʼayapjjañamatakiw chʼamañchtʼapjjsma. Sapüru liytʼapjjam ukat lupʼipjjarakim, ukhamatwa Jehová Diosarojj jukʼamp jakʼachasipjjäta, kunattejj Jupaw Biblia utjayirejja (Sant. 4:8).

Maysa toqetjja, kuna jan waltʼäwinakantï munat jilat kullakanakasajj jikjjatasipki ukajj wal llakisiyapjjetu. Ukat yaqhepanakajja, awisajj llakin uñjasisajj janiw mayninakjam kusisitäpkiti uksa amuyapjjaraktwa. Asia markankir mä familiat parltʼañäni, uka familianjja, taykaw mä akatjamat usuntawayjjäna, cuerpopajj janiw onjjtirjamäjjänti. Yatjjattʼat doctoranakas janipuniw qollirjamäpkänti. Ukajj wali llakkañapuniwa. Jichhajja, chachapajj arumay uruw warmipar uñj-jjañapa. Ukampis yoqapampi ukat pä phuchanakapampejja, cristianjamajj taqe chuymaw munasiñampi awk taykapar yanaptʼasipki. Cheqas uka familjamarakiw jumanakat yaqhepajj kunayman jan waltʼäwinakar atipjawayapjjta, ukham atipjasajj kusisitaw jikjjatasipjjarakta (Sant. 1:2-4). Alajjpachan jakañataki suytʼäwinïsktansa jan ukajj aka Oraqen jakañataki suytʼäwinïsktansa, ‘jan waltʼäwinakar atipjapjjatamatjja jutïrinjj kusisipjjatawa’ sasaw Jehová Diosajj sistu. Kunattejj wiñay jakañwa churistani (Sant. 1:12).

Pasïr marajja, 19.241.252 ukhaniw Jesusan jiwäwip amtañatakejj tantachasiwayapjje. Jehová Diosaru ukat Jesucristoru jachʼañchañataki ukham waljani tantachasipjjatapajj askipuniwa. Ukat marzo, abril phajjsinakanjja, pä millonats jilaw jilat kullakanakajj precursor auxiliarjam irnaqtʼawayapjje ukas jukʼampirakiw Jehová Diosar jachʼañchawayi. Ukat tamanak tumptʼir jilatajj visittʼkani ukhajja, precursor regularanakampi tantachaski ukarojj qalltat tukuykamaw precursor auxiliaranakajj jupanakampi tantachasipjjani. Ukampis janiw marzo, abril phajjsinakanaki ukham tantachasipkaniti. Yaqha phajjsinakan tamanak tumptʼir jilatajj visittʼkani ukhas tantachasipjjarakiniwa, uk yatiñas kusiskañarakiwa. Ajay toqet sum amuytʼasirinakajja, Diosan arunakap yatiyaña ukat yaqha ukhamanak lurañajj kunja wakiskirisa uk sum amuyapjje. Kunattejj ukaw jan aynachtʼañataki, Supayan yantʼanakapar atipjañataki ukat Diosan thakipat jan jitheqtañatak yanaptʼistani (1 Cor. 15:58).

Ukhamarakiw 2012 maran septiembre phajjsit 2013 agosto phajjsikamajj 277.344 ukhanejj Jehová Diosar jakäwip katuyasisa bautisasiwayapjje. Jichhajj oraqpachankir jilat kullakanakamp chikaw wiñay jakañar irpir thakin sarantasipki (Mat. 7:13, 14). Uka machaq jilat kullakanakajj jiwasan yanaptʼaswa ‘iyawsäwin suma uttʼatäñatakejj’ munapjje (Col. 2:7). Ukhamajj tukuykam aguantañatakejj maynit maynikam chʼamachtʼasisipkakiñäni (Mat. 24:13). Bibliajj akham sasaw ewjjtʼistu: “Mayjtʼatanakarojj chʼamañchtʼapjjam, tʼukhanakarusti yanaptʼapjjarakim, taqenimpis llampʼu chuymanïpjjarakim” sasa (1 Tes. 5:14). Ukat jan qarjtas akham sas mayisiskakiñäni: ‘Reinomajj jutpan’ sasa (1 Tes. 5:17; Mat. 6:10, NM).

Jilatanakama,