Bibliat yateqerinakar sum yatichapjjañäni
1. Khitinakatï yatichapktan ukanakajja, ¿kuna luräwinïtansa?
1 Janiw khitis Diosar yupaychkaspati, janitejj Jehová Diosajj “apankaspa ukajja” (Juan 6:44). Ukhamäkchisa jiwasaw Bibliat yatichktan ukanakar alajjpachankir Awkisar jakʼachasipjjañapatak yanaptʼañasa (Sant. 4:8). Ukatakejj sum wakichtʼasiñasawa. Diosan arunakap sum amuyapjjañapataki ukat nayrar sartapjjañapatakejja, janiw yateqerirojj tʼaqanak liytʼayasaki ukat jisktʼasaki yanaptʼksnati.
2. Bibliat sum yatichañatakejj ¿kunanaksa lurañasa?
2 Bibliat yateqerinakar sum yatichañatakejj akanak lurapjjañapatakiw yanaptʼañasa: 1) kuntï Bibliajj yatichki uk sum amuytʼaña, 2) ukanakat jan pächasiña ukat 3) Biblian yatichäwiparjam sarnaqaña (Juan 3:16; 17:3; Sant. 2:26). Taqe ukanakjja, walja phajjsinakanwa maynejj phoqaspa. Ukampis mayat maya phoqasajj jukʼampiw Jehová Diosar jakʼachasjjani ukat jakäwipsa Juparuw katuyasjjarakini.
3. Kunsa yateqerejj amuyi uka toqenakat jisktʼañajj ¿kunatsa wali wakiskirejja?
3 Yateqerisajj ¿kunsa Bibliat amuyi? Yateqerisajj kuntï yatichktan uk amuyaskiti janicha ukat kuntï Bibliajj yatichki uk iyäwsaskiti janicha uk amuyañatakejja, janiw jiwasak parlañasäkiti (Sant. 1:19). ¿Kuntï yatichasktan uka toqet Bibliajj kuns yatichi uk amuyaskiti? ¿Pachpa arunakapamp qhanañchaspati? ¿Kuntï yateqjje ukanakat kamsakisa? ¿Kuntï Bibliajj yatichki ukajj cheqäskapunitap amuyiti? (1 Tes. 2:13). ¿Kuntï yateqaski ukarjam sarnaqjjañapjja amuyiti? (Col. 3:10). Taqe ukanak yatiñatakejja, kunsa jupajj amuyi ukwa wali amuyumpi jisktʼañasa, ukat sumwa istʼañasaraki (Mat. 16:13-16).
4. Bibliat yateqeritakitï yatichtan uk amuyañajj chʼamächi jan ukajj Biblian mä yatichäwiparjam phoqañ chʼamächi ukhajja, ¿kuns lursna?
4 Awisajj kuntï creyipki, kuntï amuyapki ukanak jaytjjañapatak yanaptʼañatakejj tiempow munasi (2 Cor. 10:5). Bibliat yateqeritï, kuntï yatichktan ukar jan istʼkani, jan ukajj ukarjam jan sarnaqañ munkani ukhajja, ¿kamachsnasa? Diosan arunakapa ukat qollan ajayu yanaptʼañapatakejj pacienciampiw suytʼañasa (1 Cor. 3:6, 7; Heb. 4:12). Janiw jankʼak yateqañapatak waytʼañasäkiti, jupatakitï kuntï yatichtan uk amuyañajj chʼamächi, jan ukajj Biblian mä yatichäwiparjam phoqañ chʼamächi ukhajja, yaqha yatichäwir pasjjañaw wakisispa. Jiwasatï pacienciampi, munasiñampi Bibliat yatichañänejja, tiempompejj Biblian yatichäwinakaparjamaw sarnaqjjaspa.