Diosan Arunakap Yatiyañatak Escuela 2015, uka wakichäwejja, Bibliat sum yatichañatakiw yanaptʼistani
1 Salmonak qellqer David reyejj akham sasaw qellqäna: “Tatay, arsutajjajj jumar kusisiykirïpan, chuymajjan lupʼitapajj nayraqatamkam purinpan, jumaw imantasiñ qarqajjätajja, qhespiyirejjätasa” sasa (Sal. 19:14). Jiwasajj ukhamarakiw Jehová Diosarojj arunakasampi kusisiyañ muntanjja, kunattejj suma yatiyäwinak jaqenakar yatiyañsa ukat tama taypin yatichañsa wali askit uñjtanjja. Ukanak sum phoqañatakejja, Diosan Arunakap Yatiyañatak Escuela toqnamwa Jehová Diosajj yatichistu. Taqe oraqpachanjja, sapa semanaw uka escuelajj 111.000 tamanakan apasi. Ukhamatwa uka wakichäwejj oraqpachankir taqe kasta jilat kullakanakaru Diosan arunakap chuymar purtʼkiri, wali amuyumpi ukat jan ajjsarasa yatichapjjañapatak yanaptʼawayi (Hech. 19:8; Col. 4:6).
2 Diosan Arunakap Yatiyañatak Escuela 2015 maratak wakichäwinjja, aka qellqatanakampiw yatjjatasiskani: “Diosan Arupat yatjjatañataki”, “Bibliat apstʼata sarnaqäwinaka” ukat “Razonamiento a partir de las Escrituras”. Semanan Biblia liyiñataki arstʼäwinsa ukat nayrïr arstʼäwinsa, tiempopajj jukʼaptayatawa. Kunjamsa uka arstʼäwinakajj apasini ukat kunanakas mayjtʼayatäjje taqe ukanakatwa jichhajj yatjjataskañäni.
3 Bibliat liyktan ukan aski yatichäwinakapa. Kawkïr jilatarutï aka arstʼäwi arstʼañ waktʼkani ukajja, semanatak Biblia liyiñatak utjki uka wakichäwit pä minutonakwa mä aski yatichäwi qhanañchani. Tiempompi jan taqjjatayasiñatakejj sum wakichtʼasiñapaw wakisini. Tamankir jilat kullakanakajja, kuna aski yatichäwinaksa jikjjatawayapjje uk arstʼapjjañapatakejja, sojjta minutonakaw utjarakini, ukat mä jukʼakam (30 segundot janiw jiläñapäkiti) arstʼapjjani. Ukatakejj sum wakichtʼasiñaw wakisirakini, ukampis ukham lurañajj nayrar sartañatakiw yanaptʼistani. Maysa toqetjja, walja jilat kullakanakaw kuna aski yatichäwinaktï yatjjataniwayapki uk arstʼapjjarakini.
4 Nayrïr arstʼäwi. Biblia liyiñataki arstʼäwejja, kimsa minuto jan ukajj minusakëjjaniwa, ukat liytʼañatakejj janiw sinti jachʼäjjaniti. Khitinakarutï Biblia liyiñ waktʼkani ukanakajja, walja kutiw jachʼat liyipjjañapa, jan pantjasisa ukat amuykaywa liyipjjañapa, ukhamatwa kuntï liyisipki uk sum amuyapjjani. Cheqas Jehová Diosan markapanjja, taqeniw sum liyiñatak chʼamachasiñasa, ukhamatwa sum liyisajj Jehová Diosar jachʼañcharaksna. Wawanakar sum liyiñ istʼtan ukhajja, wal kusistanjja, ukat kawkïr awk taykanakatï wawanakapar sum liyipjjañapatak chʼamachasipki ukanakajj ¡walik ukham lurapjjtajja! satäpjjewa.
5 Payïr arstʼäwi. Uka arstʼäwjja phesqa minutonakanwa mä kullakajj parltʼani. Kuna toqettï parlañapäki uka toqetakwa parltʼañapa. Diosan Arupat yatjjatañataki qellqatat arstʼañ waktʼkani ukhajja, kunjamsa territoriopan yatiyapjje ukarjamaw lurañapa. Bibliat apstʼata sarnaqäwinaka sat libron qhep qhepa jananakan “Yaqha jisktʼäwinakampi” siski ukat apstʼatäni ukhajja, arstʼäwipajj kuna toqetsa parli uk sum amuyañatakejj textonak utjki ukanak sum yatjjatañapa, ukat kawkïrinakas wakisispa ukanakwa ajlltʼañapa. Escuela sarayir jilataw khitis kullakar yanaptʼani uk ajlltʼani.
6 Kimsïr arstʼäwi. Uka arstʼäwjja phesqa minutonakanwa mä jilata, jan ukajj mä kullakaw parltʼani. Kullakanakajja, payïr arstʼäwitak utjki uka ewjjtʼanakarjamaw lurapjjani. Ukat jilatanakajja, “Bibliat apstʼata sarnaqäwinaka” sat librot arstʼañap waktʼani ukhajja, tamatak mä arstʼäwjam lurapjjani. Jilatajj kuna toqettï parlañapäki ukakwa parlañapa, ukat Bibliat kawkïr textonakay wakischini ukanakwa ajlltʼañaparaki.
7 Kimsïr arstʼäwjja, ¿kunjamsa jilatanakajj lurapjjani? Arstʼäwitï mä asteriscompi (*) chimptʼatäni ukhajja, mä jilataruw churasini, jupajj familiapampis yatjjatkaspa jan ukajj Diosan arunakaps yatiykaspa ukhamwa lurani. Escuela sarayir jilataw khitis jilatan yanapiripani ukat kunjaman jikjjatasisas (marco de circunstancia) parlani ukanak ajlltʼani. Yanapiripajj pachpa familiapatäñapawa, jan ukajj tamankir yaqha jilataw yanaptʼarakispa. Kuna toqettï parlkani ukarojj Bibliat apstʼat yaqha textonaksa ajlltʼarakispawa. Awisajj mä irpir chuymaniruw churasini, ukampis jupajj kunjamans yatiyani khitis yanapani ukanak ajlltʼasispawa. Cheqas kunjamsa mä irpir chuymanejj familiapat maynimpi jan ukajj tamankir mä jilatampi wali sum yatichtʼani uk uñjañajj tamatakejj wali askïniwa.
Nayrar sartaskakiñatakejja, ewjjtʼanakar istʼaña ukat ukarjam lurañaw yanaptʼistani
8 Ewjjtʼa. Sapa arstʼäw tukuyatarojja, escuela sarayir jilatajj pä minutonwa yateqerirojj Benefíciese de la Escuela del Ministerio Teocrático librot ewjjtʼani. Escuela sarayir jilatajja, janiw yateqerin janïr arstʼäwip qalltkipan kunansa irnaqtʼaski uk sañapäkiti. Arstʼäwi tukuyjjani ukhaw kunansa irnaqtʼaskäna uk sañapa, ukat kunjamsa sum lurawayi, jan ukajj kunatsa uk lurañatak jukʼamp chʼamachasiskakiñapa ukanak suma arunakampi ewjjtʼañapa.
9 Lista de aspectos de la oratoria siski ukajj Benefíciese libron 79 janat 81 janakamaw jikjjatasi, ukanwa yateqerinakajj jikjjatapjjaspa. Tantachäwi tukuyataruw escuela sarayir jilatajj yateqerin libroparu kunatï wakiski ukanak qellqani, ukat ejercicio lurañatak utjki uk luriti janicha ukjja, yateqeri saparukiw jisktʼañapa. Ukharakiw jan ukajj yaqha horasanwa kunanakansa sum lurawayi ukanakat chʼamañchtʼaspa jan ukajj yaqhanakats ewjjtʼaspa. Uka ewjjtʼanakjja, nayrar sartañapatak mä suma yanaptʼjamwa yateqerejj uñjañapa (1 Tim. 4:15).
10 Yateqerin tiempop tukusjjani ukhajja, mä timbrempi jan ukajj mesa kʼachitat leqtʼasaw escuela sarayir jilatasa jan ukajj mä yanapiripas yateqerir amuyayaspa, ukjja wali amuyumpiw lurasiñapa. Yateqerejj uk istʼasajja, jankʼakiw parlañ tukuyjjañapa, ukat saraqjjañapawa. (Benefíciese, libro 282 jana 4 tʼaqap uñjjattʼäta.)
11 Diosan Arunakap Yatiyañatak Escuelar mantañataki mayitanak phoqapki ukanakajja, uka escuelar mantapjjañapatak chʼamañchtʼatäpjjewa. (Benefíciese, libro 282 jana 6 tʼaqap uñjjattʼäta.) Kunanakatï uka escuelan yatichaski ukajj Jehová Diosan markaparojj Reino toqet jan pächasisa, respetompi ukat munasiñampi yatiyañataki ukat yatichapjjañapatakiw yanaptʼawayi. Uka yanaptʼanakarjam lurtan ukhajja, Jehová Diosajj kusisiwa (Sal. 148:12, 13; Isa. 50:4).