Jupanakjam iyawsäwinïpjjañäni
1. Taman Bibliat Yatjjatañataki sat tantachäwinjja, ¿kawkïr librotsa yatjjataskañäni?
1 Taman Bibliat Yatjjatañataki sat tantachäwinjja, 2015 octubre phajjsi 19 uru saraqatarojja, Jupanakjam iyawsäwinïpjjañäni sat librotwa yatjjataskañäni. Uka librojja, 14 Diosar taqe chuym iyawsir chacha warminakan sarnaqäwinakapatwa qhanañchi. Ukampis niyas uka chacha warminakarojj uñjksna ukham qellqtʼatawa, ukhamat Jehová Diosar servisajj kuna jan walinakansa uñjasipjjäna ukanak sum amuyañasataki. Uka sarnaqäwinakajj kunjamsa jichhürunakan yanaptʼistaspa uksa sumarak uka libron qhanañchi (Heb. 6:12).
2. Jupanakjam iyawsäwinïpjjañäni sat librojja, ¿kunjam wakichtʼatasa?
2 Kunjam wakichtʼatasa. Uka libronjja, kuna maranakansa uka chacha warminakajj jakapjjäna ukas sumarak qhanañchasi, ukatjja kawkhansa, kunapachas jakapjjäna uk sumpach amuytʼañatakis mapanakaw utjaraki. Ukhamarusa, sapa jaljanjja, “Lupʼiñataki” sat recuadrow utjaraki, ukajj uka sarnaqäwinakat lupʼiñatakiw yanaptʼistani, ukhamat ukarjam sarnaqañataki. Janiw ukakïkiti, uka libron dibujonakapas wali suma kʼachachtʼatarakiwa, ukhamat uka sarnaqäwinak sum amuytʼañasataki.
3. ¿Kunanaksa aka librot askinak apsuñatakejj lursna?
3 Kunjamsa yanaptʼistaspa. Payïr janapanjja, Oraqpachan Jilïr Irpirinakan qellqanitapaw jikjjatasi, ukan akham sasaw amtayistu: “Jupanakajj kunjamsa jikjjatasipjjäna uksa amuyañamarakiwa. Ukat jan walinakan uñjasisajja, kunsa jupanakajj lurapjjäna ukat kunsa jumajj lurarakisamäna ukwa amuytʼäta” sasa. Diosan amuytʼayat uka sarnaqäwinakajja, kunjamsa uka chacha warminakajj jikjjatasipjjäna uk amuytʼañatakiw yanaptʼistani, ukampis uka toqet amuytʼkasajj janiw kunsa amuyusarjam yapjjatañasäkiti. Ukatakejj tiempo apstʼasiñasa ukat lupʼiñasarakiwa (Neh. 8:8). Chika jaljat yatjjatañ qalltasini ukhajja, sarayir jilatajj mä minutona jan ukajj minusan pasïr yatichäwit amtayasaw qalltañapa. Ukatjja tukuyañatakejja, janitï “Lupʼiñataki” sat recuadro utjkani ukhajja, maya jan ukajj paya yaqha jisktʼanakwa amtañataki lurañapa.
4. ¿Kunatsa Jupanakjam iyawsäwinïpjjañäni sat librot yatjjatañasajj wakisi?
4 Akapachajj sapüruw iyawsäwis kunaymanit aynachtʼayañ muni. Ukatakejja, Jehová Diosajj uka librompi, Yatiyañataki sat revistan mistki uka yatichäwinakamp churistu, ukhamat iyawsäwisajj chʼollqhëñapataki (Sant. 1:17). Ukhamasti Taman Bibliat Yatjjatañataki tantachäwir sarapuniñäni, ukat arstʼañatakis chʼamachasirakiñäni.