Jukʼamp sum yatiyañataki: yateqerinakasar Bibliat sapüru yatjjatapjjañapatak yanaptʼañäni

Kunatsa uk lurañajj wakisi. Yateqerinakasan ajay toqet suma saytʼatäñapatakejja, janiw Biblian qallta yatichäwinakapak yatiñapäkiti, jan ukasti Bibliat jukʼampwa yatjjatañapa (Heb. 5:12–6:1). Cheqas yatjjatañatakejja, maynejj wal chʼamachasiñapa. Ukatakisti kuntï yatipki ukat kuntï yateqasipki ukanakajj kunjamsa yanaptʼasipjje uk sum amuyañapa, ukatjja kunjamsa ukarjam sarnaqaspa uksa yatiñaparakiwa (Pro. 2:1-6). Jisktʼanakapan qhanañchäwip jikjjatañatakejja, Bibliat yateqerejj jupapachpaw Bibliat sum yatjjatañ yateqañapa. Ukatjja yateqki ukarjam sarnaqañatak chʼamachasitapajj jan walinakar saykatañatakiw yanaptʼarakini (Luc. 6:47, 48).

Kunjamsa uk lursna:

Sapa kuti Bibliat yatjjatañatakejja, kunatsa Jehová Diosar yanapap mayisiñasa ukwa qhanstayañasa (Juan 14:26; 1 Cor. 2:10).
Yatjjatañataki wakichtʼasiñajj kunja wakiskirisa uk qalltatpachwa yateqerisar yatichañasa. Ukatakejja, kawkïr arunakas jisktʼanakar qhanañchi uk kunjamsa chimptʼastan ukwa librosan uñachtʼayañasa.
Jisktʼanakar pachpa arunakapampi qhanañchañapatakiw mayiñasa. Janiw libron utjki uka jisktʼanakar qhanañchañapak suyañasäkiti, jan ukasti yaqha jisktʼanakwa lursna.
Biblia sapüru liyiñapatakiw chʼamañchtʼañasa. Internetan jw.org sat cheqan Biblia liyiñataki mä wakichäwejj utjki ukwa yateqerisar uñachtʼaysna, cheqas ukajj wali suma wakichtʼatawa (Sal. 1:2, 3).
Biblia toqet jisktʼanakan qhanañchäwinakapjja, kunjamsa Watchtower Library jan ukajj Watchtower INTERNETANKIR BIBLIOTECA sat yanaptʼanakat thaqtaspa, ukwa yateqerisar yatichañasa. Tantachäwinakan Bibliat apstʼat qellqatanakat kawkïr qellqatanakas jilapart apnaqasi ukanakajj kuna letranakampis (mnemónico) uñtʼasi uksa yatichtʼañasarakiwa.

Aka phajjsejj ak lurañatak chʼamachasiñäni:

Mä jalja tukuykasasa jan ukajj jaljan mä jiskʼa pʼeqeñchäwip tukuykasasa, kunsa yateqawayi uk mä qawqha arunakampi qhanañchtʼañapatakiw yateqerisar mayiñasa. Jan yateqerinïkstan ukhajja, Bibliat yatjjatkasasa jan ukajj Yatiyañataki sat revistan mä tʼaqapat yatjjatkasasa kunsa yateqtan uk mä qawqha arunakampi qhanañchtʼañatakiw chʼamachasiraksna, ukham lurañäni ukhajja, kuntï liyktan ukanak sum amuytʼañatakiw yanaptʼistani.