Bibliat yatichkasajja akanakwa amtañasa

Janiw sinti parlañasäkiti: Bibliat yatichkasajja, janiw sinti parlañajj wakiskapuniti. Jesusajj jaqenakan mä amtar puripjjañapatakisa ukat amuytʼapjjañapatakisa jisktʼanakwa lurirïna (Mt 17:24-27). Yateqerejj amuytʼaskiti janicha ukat kunarus creyi ukanak yatiñatakejj jisktʼanak lurañaw yanaptʼistaspa (be-S jana 253 § 3, 4). Mä jisktʼa lurasajja, kamsanis yateqerejj uk pacienciampiw suytʼañasa. Jisktʼar jan qhanañchkani ukhajj janiw jisktʼar jaysañasäkiti, jan ukasti yaqha jisktʼanakwa lurañasa (be-S jana 238 § 1, 2). Yateqerisajj amuytʼki ukarjamaw parlañasa, ukhamat machaq yatichäwinak sum amuyañapataki (be-S jana 230 § 4).

Amuytʼkay yatichañasa: Yatichkasajja, janiw kuntï yatktan uk taqpach qhanañchañajj wakiskaspati (Jn 16:12). Kuna toqetsa uka tʼaqajj parlaski ukarjamakiw qhanañchañasa (be-S jana 226 § 4, 5). Jiwasatï yatktan uka toqet taqpach qhanañchsna ukhajja, yateqerisajj janiw sum amuykaspati (be-S jana 235 § 3). Yateqeritï mä yatichäw sum amuytʼjjchi ukhajja, yaqha tʼaqaruw pasjjañasa.

Janiw walja tʼaqanak yatjjatañajj wakiskiti: Yateqerisan chuymaparuw purtʼañ muntanjja, ukatakejj janiw walja tʼaqanak yatjjatañajj wakiskiti (Lu 24:32). Yatichkasajja, Biblian kawkïr jiskʼa tʼaqapas yateqerisar yanaptʼaspa uk liytʼañasa (2Co 10:4; Heb 4:12; be-S jana 144 § 1-3). Uñachtʼäwinakampiw yatichañasa (be-S jana 245 § 2-4). Yateqerisajj kunarus creyi, kuntï yatichkañäni uk amuyaniti janicha ukarjam wakichtʼasisaw yatichañasa. Akanakwa jisktʼsna: “¿Kunjamsa yateqatamat jikjjatasta?” “¿Kunsa uka yatichäwejj Jehová Diosat yatichistu?” “Uka ewjjtʼarjam sarnaqasma ukhajj ¿kuna askinakas utjaspa?” sasa (be-S jana 238 § 3-5; jana 259 § 1).