CRISTIANJAM JAKAÑATAKI
¿Kunas Bibliat sum yatjjatañatakejj yanaptʼistaspa?
Daniel profetajj janipuniw Diosat jitheqtkänti, ¿kunjamsa jupat yateqassna? Danielajj Diosan Arupatsa profecianakatsa sumwa yatjjatirïna (Da 9:2). ¿Kunjamsa Bibliat yatjjatañajj Diosat jan jitheqtañatak yanaptʼistaspa? Kuntï Jehová Diosajj jutïrin lurañ amtki uk phoqapuniniwa sasin confiyañatakiw yanaptʼistani (Jos 23:14). Ukatjja Diosarojj jukʼampiw munasiñäni, ukarakiw kunatï cheqapäki uk lurañatak yanaptʼistani (Sl 97:10). ¿Kunsa ukatakejj lursna? Aka ewjjtʼanakaw yanaptʼistani.
¿Kuna toqetsa yatjjatsna? Tantachäwinakatak sum wakichtʼasisaw Bibliat yatjjatsna. Sapa semana Bibliat liytʼañajj waktʼkistu uka qellqatanak liytʼañasawa, ukatjja kunsa jan sum amuyktan ukanakat jukʼamp yatjjatañasawa. Ukhamarus yaqhepanakajj profecianakata, espíritu santon achupata, apóstol Pablon viajinakapata, jan ukajj Jehová Diosan luratanakapat yatjjatapjjaraki. Mä jisktʼatï utjistanejja, qellqtʼasiñasawa ukatjja uka toqetwa Bibliat yatjjataraksna.
¿Kawkjansa jukʼamp yanaptʼanak jikjjatsna? Jukʼamp yanaptʼanakjja, Biblian suma yatichäwinakap yatjjatañatak yanaptʼanaka sat videonwa jikjjatäta. Daniel libron 7 capitulon parli uka ajjsarkañ animalanakajj kawkir munañäni markanakampi sasisa ukanakat yatjjatma.
¿Qhawqha tiempos yatjjatsna? Diosat jan jitheqtañatakejj Bibliat sapa kuti yatjjatañaw wakisi. Qalltañatakejja mä jukʼakwa yatjjatsna, ukatjja sapa kutiw mä jukʼamp yatjjatsna. Diosan Arupat yatjjatañajja, jila alani imat yänaksa thaqsna ukhamawa, mä jukʼa jikjjatasajja, jukʼampinak jikjjatañ munañäni (Pr 2:3-6). Ukhamarus Bibliat yatjjatañarojj wali wakiskiritwa uñjañäni, ukatjja sapür yatjjatañwa munarakiñäni (1Pe 2:2).
DANIEL 7 CAPITULON PARLKI UKA AJJSARKAÑ ANIMALANAKAJJA, ¿KUNANAKAMPI SASISA?
JUKʼAMP YATJJATAÑATAKI:
¿Kunjamsa Daniel 7:8, 24 qellqatajj phoqasïna?
AKA TOQETWA YATJJATARAKISMA:
¿Apocalipsis 13 capitulon parlki uka ajjsarkañ animalanakajj kunampi sasisa?