¿Diosan Arupat sapür yatjjatañataki sat folletot wali sumti yatjjataskta?

¿Diosan Arupat sapür yatjjatañataki sat folleton utjki uka textsa, qhanañchäwipsa sapürut liytʼaskta? Jan ukhamäkchi ukhajja, ¿sapür liyiñatakejj chʼamachasismati? Waljanejj alwaw liytʼapjje, ukhamatwa uru jornal kun lurkasas uka toqet lupʼipjje (Jos 1:8; Sl 119:97). ¿Kunjamsa sapürutak texto liytʼasajj jukʼamp sum yatjjatasma? Nayraqatajja, kuna toqetsa uka urutak textojj parli uk yatiñatakejj mayni versiculonakwa liytʼañama. Ukatjja Biblian mä sarnaqäwipatwa lupʼiñama, uka sarnaqäwejj textojj kunsa yatichi ukarjamäñapawa. Ukjjarusti, texton yatichäwiparjam sarnaqañatakiw chʼamachasiñama. Biblian yatichäwiparjam amtanakar purtan ukhajja, Bibliamp yanaptʼayasisajj walja askinakwa jikjjattanjja (Sl 119:105).

Aka oraqpachan Betelan trabajirinakajja, sapa alwaw Diosan Arupat sapür yatjjatañataki sat folletot yatjjatapjje. Aka qhepa maranakanjja Diosar yupaychañataki alwa tantachäwin arstʼaski ukanakat jila partejj JW Broadcasting^® cheqanwa uñsti, DIOSAR YUPAYCHAÑATAK WAKICHÄWINAKA siski uka cheqana. ¿Uka videonakat kawkïrsa jichhak uñtta? Uk uñtasajj ‘nayatakjamapuniwa’ sasin inas sischisma. Sañäni, ¿Lot chacharojj kunanakatï paskäna ukanakajj kunjamsa jakäwisan yanaptʼistaspa?

JAN AKAPACHAR MUNAPJJAÑÄNITI (1JN 2:15) SAT VIDEO UÑTASAJJA, AKA JISKTʼANAKARUW QHANAÑCHTʼÄTA:

• ¿Diosar yupaychañataki alwa tantachäwin arstʼaskäna ukajj Biblian kawkïr wiñay yatichäwiparjamänsa?

• Akapacharu ukat kunanakatï akapachan utjki ukanakar munañajj jan waliruw puriyistaspa, ¿kunjamsa Lot chachan sarnaqäwipajj uk uñachtʼayistu? (Gé 13:12; 14:12; 19:3, 12, 13, 24-26).

• Jehová Diosar munasitassa, akapacharu ukat kunanakatï akapachan utjki ukanakar jan munasitassa, ¿kunjamsa uñachtʼaysna?