Aka jan wali pachajj tukjatäkani ukarojj janiw ajjsarañasäkiti

Jehová Diosan pacienciapajj niyaw aka jan wali pachatakejj tukusini. Pacienciapajj tukusjjani ukhajja, falso religionanakajj tukjataw uñjasipjjani, mayachtʼat markanakajj Diosan markap contraw saytʼapjjani. Jehová Diosasti Armagedonanwa taqe jan wali jaqenakarojj tukjarakini. Taqe ukanak pasañap wal suyasktanjja.

Cheqas jachʼa tʼaqesiñ tiempojj kunjamänisa uka toqet janiw sum yatktanti. Sañäni, kunapachapunis ukajj qalltani uk janiw yatktanti. Kunatsa gobiernonakajj falso religionanakar atacapjjani uksa janirakiw yatktanti. ¿Qhawqha tiempos mayachtʼat markanakajj Diosan markapar atacapjjani, kunjamsa atacapjjani? ¿Kunjamsa Jehová Diosajj jan wali jaqenakarojj Armagedonan tukjani? Janiw ukanaksa yatkaraktanti.

Kunanakatï jutïrin paskani ukanakarojj janiw ajjsarañasäkiti, ¿kunatsa? Ukanak jan ajjsarañatakejj kunanak yatiñatï wakiski ukanakjja, Bibliajj yatiyjjestuwa. Sañäni, ‘qhepa urunakan’ tukusiñap tiempon jakaskatas yattanwa (2Ti 3:1). Diosan markapajj jan chhaqtayatäñapatakejja, falso religionanakar tukjaskani “uka urunakajj jukʼaptayatäniwa”, uksa yatiraktanwa (Mt 24:22). Jehová Diosaw markapar salvani, ukarus taqe chuymaw confiyaraktanjja (2Pe 2:9). Jehová Diosajj jan wali jaqenakar tukjañataki, walja jaqenaka sasin uñtʼatäpki ukanakar Armagedonan salvañatakejja, cheqapar juzguirïki, chʼamanïkaraki ukaruw ajlli (Ap 19:11, 15, 16).

Taqe ukanakajj paskani ukhajja, ‘jaqenakajj ajjsarañatsa desmayapjjaniwa’ (Lu 21:26). Ukampis jiwasampejj janiw ukajj paskaniti. Jehová Diosajj kunjamsa nayra tiempon markapar salväna, jutïrin kunanakas pasani ukanak yatiykistu uka toqet liyiñäni, lupʼirakiñäni ukhajja, kuntï Lucas 21:28 textojj siski ukarjam jan payachasisaw lurañäni. Uka texton akham siwa: “Jumanakajj cheqaki saytʼasipjjam, pʼeqsa waytapjjarakim, salvasiñanakamajj jakʼankjjewa” sasa.