CRISTIANJAM JAKAÑATAKI
¿Diosan Arupar jukʼamp confiyañatakejj kunsa lursna?
Diosan Arupajj jakäwis cambiañatakejj wali chʼamaniwa (Heb 4:12). Bibliajj ‘Diosan arupäskapuniwa’ sasin jan taqe chuyma confiykañäni ukhajja, wiñay yatichäwinakapasa, ewjjtʼanakapasa, mandatonakapas janiw yanaptʼkistaniti (1Te 2:13). ¿Bibliar jukʼamp confiyañatakejj kunsa lursna?
Bibliat sapüruw liytʼsna. Mä cheqa liytʼkasajja, Bibliajj Jehová Diosamp amuytʼayatätap kunanakas uñachtʼayi ukanakwa thaqañasa. Sañäni, Proverbios libro liytʼkasajja, ewjjtʼanakapajj jichha tiempons wali yanaptʼkirïtap amuytʼañasawa (Pr 13:20; 14:30).
Biblian mä toqetwa sum yatjjatsna. Bibliajj Jehová Diosan amuytʼayatätap kunanakas uñachtʼayi ukanak sum yatiñasawa. Ukatakejja Jehová Diosan Testigonakapan Bibliat yatjjatapjjañapataki sat libron “Biblia” siski uka pʼeqeñchäwiruw mantsna, ukatjja “Diosan amuytʼayatawa” siski uk thaqtaraksna. Janiw ukakïkiti, Biblian yatichäwinakapajj jan mayjtʼayatätapar jukʼamp confiyañatakejja, Biblia Aymara. Machaq Mundon Jakirinakataki Biblian apéndice A3 uka cheqwa yatjjatsna.
¿KUNANAKAS DIOSAR CONFIYAÑATAK YANAPTʼISTASPA? DIOSAN ARUPA SAT VIDEO UÑTASAJJA, AKA JISKTʼANAKARUW QHANAÑCHTʼÄTA:
Karnak (Egipto) lugaran mä templon perqapan jikjjataskäna uka dibujonakajja, ¿kunjamsa Biblian qellqatäki ukajj cheqäskapunitap uñachtʼayi?
¿Biblian yatichäwinakapajj jan mayjtʼayatätap kunanakas uñachtʼayi?
¿Bibliajj jichha tiempokam utjaskakitapajj kunsa yatichistu? (Isaías 40:8 liytʼäta).