¿Kunatsa Diosajj taqe oracionanak jan contestki?
Jehová Diosajja, chuymatpach orasitasar istʼapuniwa. Ukampis janiw taqe oracionanakar contestkapuniti. ¿Kunatsa jan contestki? ¿Kunjamsa oracionanakasar contestañapatakejj mayisiñasa? Bibliajj kamsisa uk uñjañäni.
“Oración luräta ukhajja, jan pachpa arunakak kutin kutin arsumti” (Mateo 6:7).
Jehová Diosajja, janiw pʼeqer yatsuta oracionanak lurañas munkiti, janirakiw mä librot liyiñassa munkiti. Jan ukasti, chuymatpach orasiñaswa muni. Amuytʼañataki, mä amigomajj sapürus pachpa arunakak siristam ukhajj janiw walïkaspati. Suma amigonakajj qhanwa kuns sasipjje, taqe kunatwa parltʼasipjjaraki. Diosarojj chuymat mistkir arunakampi orastan ukhajja, mä amigorjam uñjataswa uñachtʼaytanjja.
‘Jan wali amtampi mayipjjatam laykojj janiw katoqapkätati’ (Santiago 4:3).
Kunanakatï Diosatak jan walïki ukanak jupar oracionan mayiñäni ukhajja, janiw contestkistaniti. Amuytʼañataki, maynejj qollqe layku Diosar suertenïñatak mayisini ukhajja, ¿Jehová Diosajj uka oracionar contestaniti? Janiwa. Diosatakejj taqe kun jiwasatakik munañasa, suerter creyiñasa janiw walïkiti (Isaías 65:11, TNM; Lucas 12:15). Ukhamasti janiw uka kasta oracionanak contestkaniti. Jiwasatï oracionanakas Diosan contestaniñap munstan ukhajja, kuntï jupajj Biblian siskistu ukarjam orasiñasawa.
‘Khititejj Diosan leyipar jan istʼañ munki ukan mayisitapajj ajjtaskañawa’ (Proverbios 28:9, TNM).
Nayra tiemponjja, leyinakaparjam jan luriri jaqenakan oracionanakap janiw Diosajj contestkänti, jichha tiemponsa jupajj pachpakïskiwa (Isaías 1:15, 16; Malaquías 3:6). Jiwasatï leyinakaparjam lurañatak chʼamachasiñäni ukhajja, Diosajj contestistaniwa. Nayrajj jan walinak lurstan ukhajja, ¿oracionanakas janit contestkistani? Janiw ukhamäkiti. Jiwasatï jan wali luräwinakasat arrepentisiñäni, munañap lurañatak chʼamachasirakiñäni ukhajja, perdonistaniwa, contestarakistaniwa (Hechos 3:19).