Wajjtʼasirïñasawa, utjkistu ukampis kusisitäñasawa

“KHITINAKATÏ QOLLQENÏPKI, WALJA COSASANAKANÏPKI UKANAKAW KUSISIT JAKASIPJJE” sasaw waljanejj sapjje. Ukatwa walja jaqenakajj jukʼamp qollqenïñatak wal trabajipjje. ¿Cheqapunit walja qollqenïpki jan ukajj cosasanakanïpki uka jaqenakajj kusisit jakasipjjpacha? ¿Kunas jichhakam uñjasiwayi?

Mä revistajj akham siwa: ‘Jaqenakan manqʼañapasa, isipasa, utapas utjchi ukhajja, kusisitaw jakasipjje. Jukʼamp qollqenïñajj janiw kusisit jakasiñatakisa ni sum jikjjatasiñatakis yanaptʼkistuti’ sasa (Journal of Happiness Studies). Yaqha revistajj akham sarakiwa: “Janiw qollqejj llakisiykistuti, jan ukasti qollqe jikjjatañ munañaw llakisiyistu” sasa (Monitor on Psychology). Bibliajj niya pä waranqa maranak nayrajj niya ukhamarakwa säna: “Qollqe añcha munañajj taqe jan waltʼäwinakan mä saphipawa. Qollqe añcha munañampi apayasipjjatap laykuw yaqhepajj [...] kunayman llakinakampis apjjatasipjjaraki” sasa (1 Timoteo 6:9, 10). ¿Kuna ‘llakinakansa’ uñjassna?

KUNATÏ UTJKISTU UKANAKAT LLAKISISAJJ JANIW IKSNATI. “Khititejj irnaqki, jukʼsa waljsa manqʼchi ukajja, sumaw iktʼasi; ukampis qamirirojja janiw ikiykiti qamir yänakapajja” (Eclesiastés 5:12).

TAQE KUNANÏKASAS JANIW KUSISIT JAKASKSNATI. Jaqenakajj walja qollqenïkasasa, jukʼamp munasipkakiwa, ukatwa jan kusisit jakasipkiti. Bibliajj akham siwa: “Khititejj qollqe munki ukajja jukʼampwa muni; khititejj qamirïki ukajj, jan utjirinjamakiwa amuyasi” sasa (Eclesiastés 5:10). Jukʼamp qollqenïñatak trabajisajja, waljaniw familiapampi amigonakapampi qamartʼaña, jan ukajj Diosar serviñ apanukupjje, cheqas ukanakaw cheqpach kusisiñ churistu.

QOLLQE APTʼASISAJJ WALI LLAKITAW JIKJJATASSNA. “Jan chʼamañchasimti qamiriptañataki [...]. Qamir kankañajj mä jukʼatakikiwa; mäkirakiwa tukusjje, kunjämatejj pakajj chheqhanëjjasin mäki thoqtawayjjejja ukhama” (Proverbios 23:4, 5).

¿KUNJAM CHUYMANÏÑAS KUSISIT JAKASIÑATAK YANAPTʼISTASPA?

KUNATÏ UTJKISTU UKANAKAMP KUSISITÄÑA. “Jiwasajj janiw kunsa akapachar apanktanti, janirakiw kunsa apkañäniti. Jiwasantejj manqʼasa isisa utjaskchistojja, ukanakampejj kusisitakïskañäniwa” (1 Timoteo 6:7, 8). Kunatï utjkistu ukanakamp kusisit jakasiñäni ukhajja, janiw quejaskañäniti, ni mayninakatsa envidiaskañäniti. Janirakiw jila valorani cosasanak alañ munasajj llakimp apjjataskañäniti.

WAJJTʼASIRÏÑA. “Katoqañat sipansa churañanwa jukʼamp kusisiñajj utji” (Hechos 20:35). Wajjtʼasirïpki ukanakajja, mayninakar yanaptʼasajj kusisitaw jakasipjje. Yaqhepajj jan qollqemp yanaptʼirjamäsajj tiempo apstʼasisaw mayninakar yanaptʼapjje. Ukham yanaptʼirinakajja, wali munatäpjjewa, respetompi uñjatäpjjewa, suma amigonakanïpjjewa, amigonakapas ukhamarakiw jupanakar munasiñamp uñjapjje, taqe ukanakjja janiw qollqemp alksnati (Lucas 6:38).

COSASANAKAR MUNASIÑAT SIPANSA JAQENAKARUW MUNASIÑASA. “Vaca aycha uñisiñampi manqʼañat sipansa, jukʼamp askiwa munasiñampi chʼojjñanaka manqʼañajja” (Proverbios 15:17). Walja qollqenïñat sipansa, suma amigonakanïña ukat taqenimp sum apasiñaw jukʼamp wakiskirejja. Uka munasiñaw kusisitäñatakejj yanaptʼistu, ukwa qhepat yatjjataskañäni.

Sudamérica cheqan jakasiri Sabina warmejja, Bibliajj kunjamsa yanaptʼistaspa uk jupapachpaw uñjäna. Esposopajj utat sarjjäna ukhajja, kunatï jakasiñatak wakiski ukanak alañatakisa pä wawanakapar uywañatakis wal chʼamachasïna. Pä trabajonïnwa, sapüruw pusi alwa horasat trabajañ qalltäna. Wali qaritäkchïnsa, Bibliat yatjjatañwa amtäna. ¿Kunjamsa ukajj yanaptʼawayi?

Janiw jukʼamp qollqenïkänti, ukampis Bibliat yatjjatasajj kusisitaw jakasjjäna. Diosat yatjjatasasa, kuntï yateqkäna ukanak mayninakar yatichasas kusisitaw jakasïna (Mateo 5:3). Cheqpach amigonakwa jikjjatarakïna.

Bibliajj akham siwa: “Maynin yatiñanïtapajj luratanakapanwa uñjasi” sasa (Mateo 11:19). Kunatï utjkistu ukamp kusisitäñasa, wajjtʼasirïñasa, cosasanakar munasiñat sipansa jaqenakar munasiñasa, yatiñan jaqëtaswa uñachtʼayi.