12. Kuns luräta uk amtaña

¿KAMSAÑSA MUNI?

Kun lurañ amtasajj janiw aleqak munañasäkiti, jan ukasti uk phoqañatakejj sum amuytʼasiña, paciencianïña, wal chʼamachasiñaw wakisi.

Kuntï lurañ amtkañäni ukanakjja, mä qhawqha urunakata jan ukajj phajjsinakatwa phoqsna, yaqhep amtanakjja mä qhawqha maranakatwa phoqaraksna. Ukampis jaya tiempotak uchasktan uka amtanakjja, jukʼat jukʼatwa phoqañasa.

¿KUNATSA WALI WAKISKIRI?

Kun lurañtï amtkta uk phoqasajja, jukʼampwa juma pachpar confiyasïta, amigonakamampis jukʼamp sum apasïta, kusisitaw jakasirakïta.

Jukʼampwa juma pachpar confiyasïta. Jan sinti chʼamäki ukanak lurañ phoqäta ukhajja, jukʼamp lurañanak phoqañjja janiw ajjsarkätati. Jan walinakan uñjasiñsa janirakiw ajjsarkätati. Jan walinak lurayañ munapkätam ukhas janiw istʼkätati.

Amigonakamamp jukʼamp sum apasïta. Amtanakap phoqañatak chʼamachasiri jaqenakampi chikachasiñajj taqeniruw gustistu. Yamas amtanakas phoqañatak maynit maynikam yanaptʼasktan ukhajja, amigonakasampejj jukʼamp sum apastanjja.

Kusisitaw jakasïta. Kuna amtanaktï uchaskta uk phoqasajja, kusisitaw jakasïta.

“Kunanaksa lurä uk amtañajja, tiempo jan aptʼasiñataki, chʼamachasiñatakiw yanaptʼitu. Amtanakaj phoqañajj wal kusisiyitu. Akham saraktwa: ‘Walikpun ukham lurtjja’ sasa” (Christopher).

BIBLIAJJ KAMSISA: “Thayar uñchʼukirejja, janiw yapuchkaniti, ukhamarak qenayar uñchʼukirisa, janiw achunak apthapkaniti” (Eclesiastés 11:4).

¿KUNSA LURASMA?

Kunsa luräta uk amtañatakisa, ukanak phoqañatakisa, aka ewjjtʼanakarjam lurañamawa:

Kunanaksa luräta uk amtañamawa. Kunanaksa lurañ munasma ukanak qellqtʼasiñamawa, ukatsti kawkïrinak phoqañatakis nayraqat chʼamachasïta uk qellqtʼasiñamarakiwa.

Kunjamsa amtanakam phoqäta uk amuytʼañamawa. Akanakwa lurasma:

• Qhawqha tiemponsa phoqäta uk amuytʼasim.

• Phoqañatakejj kunanaksa luräta uk qellqtʼasim.

• Kuna jan walinakas utjaspa, kunjamsa ukanakar atipjasma ukanak amuytʼasim.

Amtanakam phoqañatak chʼamachasim. Qalltanjja, janiw taqe kunas sum phoqasiñapapunejj wakiskiti. Jan ukasti, kunsa nayraqat lurañama ukwa amuytʼasiñama, ukarjamaw lurañamaraki. Kunjamsa amtanakam phoqaskta ukwa mä qhawqha tiempot amuytʼasiñama.

BIBLIAJJ KAMSISA: “Suma amuytʼampi kuna amtäwinaka wakichatasa sumakiwa phoqhasi” (Proverbios 21:5).